Швейк в Москві

Так далеко од себе в загранічній політіці, як то є днесь, якбач Чеська і Словацька републіка іщі не стояли. Влада Петра Нечаса в Празі днесь у вопросах войны на Україні стоїть на другім боці барікады в порівнаню з владным кабінетом Роберта Фіца в Братіславі. Холем так ся то може видіти.

Покля перейдеме ку детайлам, пак будеме мусити признати, же не все то платить на сто процент. Самособов, чеська влада просаджує тверды санкції проти Росії, на другім боці Словакія, і кедь мав сучасный председа влады вецераз міцны высловы, жадны санкції проти Росії не заблоковала.

Хоць Фіцова влада повіла уж в моменті, коли перевзяла власти у 2023-ім році, же не пошле ани єден патрон на Україну, а Чеська републіка цілый час підтримує Київ і воєньскы, Словакія далше весело продавать воєньскый матеріал, включно споминаных патронів, Українцям. Бізніс є бізніс. І могли бы сьме продовжати.

Покля дашто справды платить о політіці сучасной словацькой влады, пак то можеме выразити словом лицемірство, што словацькый премєр называть „сувереннов загранічнов політіков на вшыткы штири світовы стороны“. Якы то буде мати дослідкы на країну під Татрами, будеме видіти.

Лемже образ ясной, проевропской, проукраїньской пражской політікы, котра хоче ясно вказати Москві, же за войну, котра уж іде третій рік, мусить платити, дакус в послідніх днях зопсула на першый погляд дрібна інформація.

Лукаш Кованда, головный економ єдной чеськой банкы, перед пару днями звернув увагу на факт, же Чеська републіка експортує до Росії веце пива як перед войнов. Кованда на соціалній стіті X написав, же Чеська републікы выекспортовала од януара до октобра 2024-го року до Росії майже 33,1 тісяч тон пива, што є майже 62 міліонів пивных літрів.

В першых десятьох місяцях 2023-го року то было 26 тісяч тон, значіть експорт пива до Росії підняв ся о 27 процент. Ціна до Росії експортованого пива за даны місяці в 2024-ім році є коло 32,6 міліонів евр. Тілько на тім заробило ся.

Золотый напой, чеська націонална гордость, золоте теля каждого „порядного“ чеського хлопа, екстра експортный артікел, котрому може в популарности якбач конкуровати лем Швейк, такым способом не є нияк засягнутый в іншых припадах твердо чеськов владов просаджованыма санкціями, і далше може робити „добре імя“ републікы і в Росії.

Люди хотіли такы основны річі, як є выпити собі пиво, і мати можливость купити собі авто.

Не было бы на тім нич чудне, кебы то не было так дакус траґікомічне. Пиво бы притім могло быти тото перше, што бы могла Чеська републіка заблкоковати.

Але на цілу кавзу коло чеського пива в російскых склепах і корчмах можеме посмотрити ся і з іншого боку.

Перед якымсь часом видів єм серію документів під назвов Збогом товарищи. Холем думам, же то было в тім серіалі. Кажда часть занимала ся кінцьом комуністічного режіму в іншій державі, што ку тому вело, якы были найважнішы причіны. Єдна часть была, самособов, присвячена Совітьскому союзу.

Заінтересовав ня там погляд єдного із респондентів. Союз перед кінцьом режіму і своїм розпадом окрім іншого терпів на недостаток автомобілів і недостаток пива. Споминаный респондент в тім документі повів, же такы режімы не кінчать на даякых великых ділах, але на дрібніцях.

Люди хотіли за його словами такы основны річі, як є выпити собі пиво, і мати можливость купити собі авто. А кедь тото довгый час было ненаповнене, звекшовала ся неспокіность людей, а почав падати і режім. Припустьме тоту теорію.

Кедь ся днесь на Западі роздумує над тым, же уж нелем про закінчіня войны на Україні, але цілково про безпечность у світі буде якбач потрібне і то, жебы скінчів режім Владиміра Путіна, пак бы ся може было добрі задумати і над тым, ці режім зложыть на землю ґаз, французьскый сыр, чіпы, компютеры, причім у векшыні припадів ся і так санкції знають обыйти, або ці фундамент паду режіму не буде в такых баналных річах, якыма суть пиво і автомобілы.

Знаме, же в другім споминанім припаді – з автомобілами, собі вже Росія вдяка Кітаю дала рады. Але іщі все ту зістало пиво. Покля чекате на пад режіму в Москві, і довго не буде приходити, спомяньте собі на то, же в тій войні Швейк до Москвы возить пиво.

Статя была написана як коментарь „Вступне до контроли“ лемківского радія lem.fm. Жрідло фотоґрафії: Pixabay.com.