Сумар дня на 27. січня/януара 2025 р.

Приносиме вам сумар медияльной ґрупы ЛЕМ.фм+ на ден 27. січня/януара 2025 р.

Мият тридцет років од кодифікациі русиньского языка на Словациі

Рівно 30 років тому на Словациі выголошена была кодифікация русиньского языка. Святочне выголошыня кодифікациі русиньского языка одбыло ся в Братиславі 27. січня/януара 1995 р. В звязку з округлым ювілейом Округлый Стіл Русинів Словациі выголосил 2025 рік за Рік Русиньского Языка. Днес представникы ОСРС і партнеры платформы припомнут собі річницю подійом при таблици, котра припоминат кодифікацию, в інтернатах Дружба в Братиславі. Там, перед 30. роками одбыло ся выголошыня кодифікациі. Ювілей припоминали си Русины уж в минулу пятницю 24. січня/януара святочном академійом, яка прошла в просторах Театру Александра Духновича в Пряшові. На академію были запрошены цінны гості, особности, котры брали участ в кодифікациі, але і тоты, котры за три декады дали вклад до розвитку русиньского языка на Словациі. Подію зрыхтувала Русиньска Оброда на Словациі. Підчас академіі вызвучали м.ін. вершы присвячены кодифікациі, спомины, як і сам текст Декларациі зо святочного выголошыня кодифікациі русиньского языка на Словациі. Проґрам збогатили музичны выступы Піддукляньского Умелецького Людового Субору та русиньского акордеонового віртуоза Петра Сокола. На конец академіі были переданы памятны плякеты, котры Русиньска Оброда на Словациі уділила за долгорічны активности реализуваны на полю популяризациі і розвитку русиньского кодифікуваного языка і його аплікациі до каждоденного жытя Русинів. Веце на тоту тему прочытате в дописі на нашым портали.

Дальшы спортовы інвестициі в Креници

Ґміна Крениця фурт інвестує в зимовы спорты. В тым році креницкы власти плянуют розвиток санечковых спортів. Як інформувал бургомайстер Крениці Пьотр Рыба, іщы в тым році буде ся мож тішыти з позволіня на будову стартовой вежы для санок і скелетону, нового місцевого пляну просторного заґаздуваня, котрый позволит на будову штучно мороженого санечково-бобслейово-скелетонового тору на Горі Івонка та середовискового рішыня потрібного до реализациі той інвестициі. Тым самым Крениця хоче остати єдным з найбарже мультіспортовых осередків в Польщы.

«Три ябка» в Рускій Бурсі в Ґорлицях

Уж в найблизшу суботу, першый ден лютого/фебруара, просиме до Руской Бурсы в Ґорлицях на пєсу «Три ябка». Представліня зачне ся о 17.00 год. В минулым році Стоваришыня «Руска Бурса» в Ґорлицях в рамках свойой діяльности вырішыло збогатити лемківску драматурґію, і попросило о написаня пєсы Станіслава Білого, вызначного словацкого автора. Білый в своій пєсі одкрыват універсальны вопросы, но делікатно іх прифарблює лемківскыма реалиями. Пєса была писана на конкретны три акторкы: в ролях выступлят Івона Іскра-Криницка, Наталия Малецка-Новак і Моніка Тылявска. Станіслав Білый пєсу написал і вырежысерувал. Драматурґію робил Петро Медвідь, котрый текст переклал на русиньскій язык. Адаптацию тексту на лемківскій стандард зробил Петро Криницкій. Музику скомпонувал Матуш Павлик, і зо сценоґрафійом поміг Мирко Пелехач. Пєса «Три ябка» могла быти зреализувана завдякы підпорі Міністерства Внутрішніх Справ і Адміністрациі. Веце на єй тему прочытате на нашым портали. Красні просиме!