Русины собі в Братіславі припомянули 30 років од кодіфікації языка

В понедільок 27-го януара 2025-го року, точно 30 років од часу, коли одбыло ся святочне выголошіня кодіфікації русиньского языка на Словакії, Округлый стіл Русинів Словакії (ОСРС) зорґанізовав у столиці републікы – Братіславі, подію, котров Русины припомянули собі тот історічный момент.

Подія проходила при памятній таблі на інтернатах Дружба, котра кодіфікацію припоминать, і котра была там одкрыта у 2013-ім році. Якраз в конґресовій салі інтернатів Дружба в Братіславі одбыло ся святочне выголошіня кодіфікації.

По русиньскій гімні, котру заспівали участны, і яка одкрыла цілу споминову подію, поклали ся ку памятній таблі вінці. За ОСРС положыв вінець председа платформы Петро Штефаняк, за Здружіня інтеліґенції Русинів Словеньска (член ОСРС) його председа Ян Липиньскый, і за родічів дітей, котры ходять до Дітячого фолклорного ансамблю Рутенячік в Братіславі Йосиф Бадида.

Пак наслідовали приговоры. Наперед приговорив ся голова ОСРС Петро Штефаняк, по нім мав приговор председа Русиньской оброды на Словеньску (РОС) Мартін Караш. Якраз РОС была головным ініціатором і мотором кодіфікації перед 30-ма роками. Як Штефаняк, так і Караш в приговорах згодли ся в тім, же кодіфікації русиньского языка на Словакії была найвызначнішым моментом в історії Русинів по 1989-ім році.

Припомянули, же і вдяка тому днесь маєме свої медії, інштітуції, включно інштітуту на універзіті, же русиньскый язык може быти і на школах.

По приговорах председів докторандка Інштітуту русиньского языка і културы Домініка Новотна прочітала пару спомин єдного із головных кодіфікаторів – Василя Ябура. На кінцю заспоминав собі і Мілан Андраш, котрый довгы рокы быв председом Містной орґанізації РОС в Братіславі, і котрый выбавив, жебы якраз в просторах Дружбы могло одбыти ся святочне выголошіня кодіфікації. На святочнім выголошіню быв прямым участником.

Спомины Ябура і Андраша ясно вказали на то, же сітуація ани здалека не была легка. Было много тых, котры бойовали проти того, жебы Русины зреалізовали кодіфікацію.

Ябур споминав на то, як тыждень перед кодіфікаційов дістав телефонат, же кодіфікація не сміє ся зробити, а мусив схосновати свої контакты на Словацькій академії наук, жебы ся тому дефінітівно не заборонило. Андраш окрім іншого припомянув, же посланці Народной рады Словацькой републікы дістали матеріалы на людей, котры приготовльовали будьякым способом кодіфікацію, і тоты матеріалы їх мали діскредітовати. На основі того пак втогдышній председа влады Владимір Мечіар одклиав свою участь на кодіфікації.

Але кодіфікація наперек тому наконець одбыла ся, за што вшыткым, котры будьякым способом на тім взяли участь, ОСРС высловлює велику подяку.

Святочна подія пак продовжовала малым погощіньом в просторах Дружбы, котре забезпечів ОСРС.