Лемковина Ультра Трейль в партнерстві з Академійом Леона Козміньского

Академія Леона Козміньского, єдна з найліпшых бізнесовых учелен в Серединно-Східній Европі, зачала спілпрацу з орґанізатором змагань Лемковина Ультра Трейль. Тоты гірскы змаганя знаны сут в цілій Польщы, мают тіж свою реному в Европі. Партнерство споює спорт, едукацию і соспільніст, а тіж реґіон Лемковины – што становит важный контекст цілой подіі.

Порозумліня спілпрацы підписали ректор Академіі Леона Козміньского проф. др габ. Ґжеґож Мазурек та Кжыштоф Ґайдзіньскій, директор змагань. В центрі находит ся головні Лемковина Трейль – найбарже знана подія в портфолийо орґанізатора, але спілпраца обнимат тіж дальшы ініциятивы розвиваны довкола соспільности заанґажуваной в спорт і активніст під одкрытым небом, як Маратон Віґры на Сувальщыні ци цикль біциґльовых змагань Warsaw Gravel Series.

Лемковина Трейль од років притігат бігачів не лем скальом спортового выклику, а тіж вынятковом сценерийом змагань. Трасы ведут через горы, в великій мірі вздолж Головного Бескідского Шляку. Орґанізатор старат ся тіж вказати реґіон як автентичный, спокійный і міцно осадженый в натурі. «То простір, котрый асоциює ся з тишом, краєвидом, лемківском спадковином, деревяном архітектуром, а тіж з природничо цінныма обшырями».

«Лемковина Трейль од самого початку то было штоси веце як лем біговы змаганя» – бесідує Кжыштоф Ґайдзіньскій, директор змагань. «То запрошыня, жебы досвідчыти Низкій Бескід – вынятковый реґіон, з його краєвидом, історийом, локальністю і атмосфером. Барз ся тішу, же во спілпрацы з Академійом Леона Козміньского можеме злучыти світ спорту з едукацийом і спілпрацом з соспільністю, а нашы досвідчыня зоставити з науковыма нарядями оціны. Тото партнерство принесе реальну вартіст – так для участників подій, як і для реґіону» – підкрислят.

Спілпраца Академіі з Лемковином Трейль має мати шыршый вымір, як лем присутніст маркы на спортовій подіі. Академія зрыхтує рапорт влияня Лемковины Трейль на реґіон, проанализує го з соспільной, візерунковой і локально-економічной перспектив. Бадачы Академіі мают уж досвідчыня в того рода проєктах. В 2025 році разом з Фундацийом «Варшавскій Маратон» опрацували рапорт, якій вказал економічне влияня Варшавского Маратону і Варшавского Пілмаратону на столицю – вказал він, як велику вартіст для міста і його мешканців родят біговы подіі.

Рівнолеглі ансамбль Лемковины Трейль буде мериторичным підпертьом для подипломовых студий Заряджаня в спорті – внесут до проґраму вчыня практичный підхід звязаный з орґанізацийом сильной, розпознавальной спортовой маркы і будуваньом заанґажуваной соспільности при подіях.

«Біганя дає енерґію, вчыт консеквенциі і вказує, як вельо мож осягнути завдякы систематичности. Барз ня тішыт партнерство з Лемковином Трейль – подійом, котра спаят спортовы амбіциі з автентичным досвідчаньом місця. В Академіі Леона Козміньского маме активну, заанґажувану спільноту і з добрі діючым Kozminski Runners Club, зато такє получыня сил є для нас натуральне. Лучыме активніст, реляциі і вартости, котры сут нам близкы» – повіл проф. др габ. Ґжеґож Мазурек, ректор Академіі.

Академія Леона Козміньского єст самодільном, фінансово незалежном непубличном учельньом. Оферта обнимат ріжны проґрамы І і ІІ ступени студий, подипломовы студиі, МБА ци доктроскы. Має польскы і узнаны в світі акредитациі, в тым потрійну корону акредитациі EQUIS, AACSB, AMBA. Занимат высокы місця в світовых і державных едукацийных ранкінґах. Од 2009 рока Академія неперерывно находит ся в ранкінґах «Financial Times», як єдна серед найліпшых учелен світа.