Підпиш петицию: Ніт для вежы на Святій Горі Явір

Не тихнут контроверсиі коло горы Явір, ци радше треба бы писати – Святой Горы Явір. Святой для Лемків. Як сме уж парократно інформували на нашым портали, власти заплянували побудувати як раз на Яворі видокову вежу. До того має там быти зроблена і пленерова експозиция посвячена барскым конфедератам.

Здає ся, же в демократичній державі голос соспільства, люду, ци як то дакотры люблят называти – суверена, повинен мати дакє значыня. З інформаций, якы дотерли до нашой редакциі, выходит, што одбыли ся уж консультациі.

«Высловлюєме рішучый спротив односно до плянуваной будувоы выдоковой вежы та історично-природничой стежкы на горі Явір (723 м. н.р.м) в Высовій в Низкым Бескіді» – пишут авторы інтернетовой петициі.

Наша редакция навязала контакт з Надлісництвом Лося, якє переконує, же вежа не буде мала влияня на сакральну част горы, на котрій побудувана є стара грекокатолицка каплиця і тырват будова новой православной святыні.

Тым не меньше, орґанізаторы петициі достерігают факт, што сама гора Явір то не звычайна гора на обшыри Лемковины. «Істория горы Явір сігат 1925 р., коли то в тій околици были обявліня Богородиці. На верху горы побудувано каплицю, якой вознесіня было величезным вызвом для локальной соспільности. До днес, попри миняючым рокам і розсіяню Лемків по ріжных частях світа, гора Явір остає символом духовности, традициі і достоменности» – пише ся в дальшій части.

Што лучыт більшіст выповіди тых, якы сут проти плянуваній інвестициі Надлісництва Лося, то тото, што побудуваня вежы і археолоґічно-природничого парку перечыт характерови того місця, але тіж є загорозом для його сакральной частины. Власти, якы задумали обі інвестициі, тлумачат ся тым, што хотят збільшыти заінтересуваня і туристичный рух в реґіоні. Лем же, тоты, што кус ся на справі знают, а при тым в Высовій прожывают, твердят, што нияк ся тото має до цілости, де потрібны сут інчы акциі, што мали бы дакус влияти на збільшыня туристичного руху в тій части Лемковины. Інча справа, яка тіж задумує, чом як раз вежа і стежка мали бы конечно быти на горі Явір? Ци в реґіоні ніт більше верхів, якы могли бы сполняти запотрібуваня ініцияторів?

Любителі горы Явір апелют о пошануваня для культуровй спадковины того місця. Апелюют і о тото, штобы была дальше захована традиция і духовіст горы, без додатковых річы, якы на силу здают ся вводити дециденты.

Петицию мож підписати за тым мотузком.