Сумар дня на 7. мая 2025 р.

Приносиме вам сумар медияльной ґрупы ЛЕМ.фм+ на ден 7. мая 2025 р.

Матура з лемківского языка зарахувана!

Од понеділька проходят в Польщы матуральны іспыты. Вчера, то єст в другій ден матур, одбыл ся еґзамін з лемківского языка. Мило нам поінформувати, же і того рока нашол ся одважный чловек, якій рішыл провірити знаня свого рідного языка на матуральным рівни. Тым одважным являт ся Михал Стариньскій з Ліґниці, сын Юрия Стариньского, основателя і кєрівника Лемківского Ансамблю Пісні і Танця «Кычера», в котрым од наймолодшых років діял і тогорічный матуриста. На тот момент недоступный єст іщы публичні матуральный аркуш, кєд лем ся явит, будеме інформувати, з якыма темами треба было ся зміряти. Сердечні ґратулюєме еґзаміну.

Мотузок до аркуша найдете гев: MMZZ-R0-100-2505.

Надлісництво Лося подає, што справа будовы вежы на Святій Горі Явір была консультувана з Обєднаньом Лемків

Ґенеральна Дирекция Державных Лісів переслала одповід на неґативне становиско Стоваришыня «Руска Бурса» в Ґорлицях в справі будовы видоковой вежы на Святій Горі Явір. В одповіди Ґенеральна Дирекция Державных Лісів подає, што проєкт реализуваный Надлісництвом Лося был (цитуваня) «попередженый шырокыма соспільныма консультациями». Як подає в писемным поясніню Надлісництво Лося – іщы в червци/юнію 2024 рока, перед приступліньом до аплікуваня о середкы з проґраму Інтерреґ, з котрых плянувана інвестиция має быти сфінансувана, зорґанізувано консультацийну стрічу, в котрій участ взяла Війт Ґміны Устя Рускє, представникы Обєднаня Лемків (в тым Презес Заряду) та властивы територияльні духовны – грекокатолицкій та двох православных священників. В ефекті той стрічы рішено о «конечности захованя просторовой окремости плянуваных інвестиций од Святого Місця». Ґенеральна Дирекция Державных Лісів пише, што Надліснитво діяло в явный спосіб, давало можливіст зголошати увагы і дале «є одкрыте на дальшый діалоґ та орґанізацию спільной тереновой візиі».

Памятникы ІІ світовой войны

В тых днях минят 80. річниця закінчыня ІІ світовой вийны. Тяжкы боі проходили тіж в русиньскым реґіоні під Дукльом. Карпато-дукляньска операция узнавана єст за єднен з найбарже кырвавых епізодів ІІ світовой войны на тій обшыри. Боі тамтого часу припоминают напримір памятникы і цмонтері на Дукли і в Свиднику, де похованы сут тисячы вояків. Вєдно з інчыма обєктами становлят словацку Нацийональну Культурну Памятку Дукляньскє Поле Битвы. На Дукли похованы сут словацкы, чешскы і русиньскы жолніры. Памятник має форму латиньской буквы V, што символизує клин вбитый совітскыма і чехословацкыма войсками до німецкой обороны в тій части східнього фронту. Памятник в Свиднику творят штырі масовы гробы, де похованых было 9000 членів Червеной Арміім, з котрых дотепер повело ся зідентифікувати лем понад 500.

Преосвященный Владыка Курт Бурнетт на Підкарпатю

В послідніх днях Мукачівску Грекокатолицку Єпархію одвиділ Преосвященный Владыка Курт Бурнетт, єпарха в Пассаіку, в Зъєднаных Штатах Америкы. Владыка пришол на Підкарпатя в часі, коли мала одбыти ся беатифікация нового священномученика Петра Павла Ороса. З причыны смерти Папы Рисмкого Франциска і браку підписаня вшыткых необхідных документів, дата беатифікациі мусіла быти перенесена. В ден заплянуваной беатифікациі, 3. мая, Владыка Курт разом з Преосвященным Владыком Теодором Мацапулом, мукачівскым єпархом, одслужыли літургію в академіцкым храмі при Ужгородскій Грекокатолицкій Богословскій Академіі. Пішли тіж м.ін. до села Білкы, де помолили ся при мощах священомученика Петра Павла Ороса. Владыка Курт быв призначеный Папом Франциском в 2013 р. за правлячого єпископа Єпархіі Пассаік, яка належыт під русиньску Пітсбуржску Митрополию. Є і апостольскым адміністратором sede vacante Еґзархату Святых Кірила і Методия в Торонто, якій так само є підпорядкуваный під Пітсбурґ.