Сумар дня на 9. мая 2025 р.

Приносиме вам сумар медияльной ґрупы ЛЕМ.фм+ на ден 9. мая 2025 р.

Конкляве выбрало нового єпископа Риму

Вчера, в патницю 8. мая 2025 р. конкляве выбрало нового єпископа Риму. Новым папом остал кардинал Роберт Франсіс Превост. Принял імя Лев ХІV. То першый папа авґустинец і першый, котрый походит з Пілнічной Америкы. Новый папа вродил ся в 1955 р. в Шікаґо в Зъєднаных Штатах Америкы. Высвяченый на священника был в 1982 р в Римі. Од 1995 р. служыл в Перу, як парох, місийонар і выкладовця. В 1987 р. оборонил докторат з канонічного права на Папскым Університеті Св. Фомы з Аквіну. В 1999 р. вернул до ЗША, а в роках 2001-2013 был ґенеральным приором Закону Святого Авґустина. В 2014 р. папа Франциск менувал го апостольскым адміністратором єпархіі Чікляйо в Перу. В роках 2015-2023 полнил функцию єпископа єпархіі Чікляйо. В січни/януарі 2023 р. піднесеный был до ранґы архієпископа. В вересни/септембрі того самого рока папа Франциск менувал го кардиналом, з титулярным костелом св. Монікы, належачым до римской діаконіі той самой святой. Кардинал Превост обнял єй на початку 2024 р. В лютым/фебруарі тр. папа Франциск влучыл го в чысло кардиналів-єпископів, признаючы му єпархію Альбано. Новый Святый Отец был выбраный в другій ден конкляве, в четвертым голосуваню.

Округлый ювілей Высокопреосвященого Кірила Василя

В минулу середу 7. мая в кошыцкым грекокатолицкым Катедральным Соборі Рождества Пресвятой Богородиці одбыло ся торжество з нагоды недавного ювілею – 60. років кошыцкого єпархы – Высокопреосвященого Архієпископа Кірила Василя. На торжество пришли і апостольскій нунций на Словациі Ніколя Джірасолі та председа Конференциі Єпископів Словациі і кошыцкій римокатолицкій архієпископ і митрополита Бернард Бобер. З грекокатолицкых єпископів на Словациі участ взяли Высокопреосвященый Йона Максим, Преосвященый Петро Руснак, Преосвященый Мілян Лах і кыр Мілян Хаутур. На торжество прибыли і єпархы з другых держав – м.ін. Преосвященый Теодор Мацапула – мукачівскій єпарха і вшыткы єпископы Грекокатолицкой Митрополитарной церкви на Мадярах. З Польщы пришол Высокопреосвященый Євгеній Мирослав Попович – архієпископ і митрополита перемышльско-варшавскій Украіньской Грекокатолицкой Церкви. Участны были і дальшы словацкы римокатолицкы єпископы. На ювілей пришли тіж дистриктуальный єпископ Східнього дистрикту Євангелицкой церкви ауґсбуржского віроісповіданя Петер Мігоч та Высокопреосвященый Георгій – архієпископ михалівско-кошыцкій Православной Церкви в Чешскых землях і на Словациі.

«Кычера» отримала дофінансуваня на Фестіваль і каменарскы варштаты

Лемківскій Ансамбль Пісні і Танця «Кычера» поінформувал, што отримали з Буджету Державы спертя на реализацию двох задач. Першом з них єст ХХVIII Медженародный Фольклористичный Фестіваль «Світ під Кычером», на котрый ансамбль отримал дофінансуваня в высокости 55 тис. злотых. Другом задачом сут каменярскы варштаты получены з реновацийом капличок і памяток на лемківскых цмонтерях в Ґладышові і Ганчовій та вчыня выконуваня написів на камени. На тоту задачу признане было 30 тис. злотых. Задачы сут дофінансуваны з середків Міністерства Внутрішніх Справ і Адміністрациі.

Новый проґрам лояльности для одвиджаючых Мушыну

Туристы одвиджаючы Мушыну можут скорыстати з новой курортной карты. То свого рода проґрам лояльности для осіб, котры платят курортну оплату. По єй оплачыню отримают код QR, якій дає вшелеякы бонусы на ріжны атракциі на обшыри Мушыны – знижкы на білеты вступу, ґастрономічну оферту, містну комунікацию ци стрефу платного паркуваня. До нового проґраму фурт долучают дальшы фірмы, зато оферта з часом буде ся звекшала. Як подал бургомайстер Мушыны Ян Ґольба, до проґраму приступуют і підприємці з Крениці. Новый систем має спомочы і кватеродавців, котры зыскают выгоду, ощадніст часу і комфортову методу розрахуваня. З часом мают быти выдаваны специяльны білеты з кодом, жебы не ограничати ся лем до смартфонів. Курортна оплата єст поберана од вшыткых туристів, котры рішат затримати ся в курортах на долше як єден ден. О єй выжній граници рішат каждого рока Міністер Фінансів. Самоуряды можут перезначыти зобраны середкы на інвестициі звязаны з туристиком і утриманя атракций.