Сумар дня на 14. мая 2025 р.

Приносиме вам сумар медияльной ґрупы ЛЕМ.фм+ на ден 14. мая 2025 р.

В суботу в Явожні упамятніня лемківскых жертв Центрального Лаґру Працы Явожно

В найблизшу суботу 17. мая в Явожні, з ініциятивы креницкого православного пароха з Крениці – о. Петра Пупчыка, пройдут упамятніня жертв явожняньского лаґру – Центрального Лаґру Працы Явожно, в якым, медже інчыма, вязнены і мучены были Лемкы. При лемківскым памятнику буде одслужена о 13.00 год. панахіда. Присутны будут делеґациі Лемків з гір і з заходу. Явожняньскій памятник был одкрытый в 2017 р. в рамках упамятнінь 70. річниці акциі «Вісла». Видно на ним інскрипцию в трьох языках, в лемківскым, польскым і анґлицкым, котра звучыт: «Вязненым і страдавшым / в лаґрі в Явожні / в наслідстві акциі «Вісла» Лемкам – Потомны. Лемківскє упамятніня жертв явожняньского лаґру поставлене было по долгых роках систематичного фальсифікуваня лемківской істориі, поменшаня лемківского терпліня і неспоминаня на Лемків – вязнів явожняньского лаґру двох тоталітаризмів. Поставліня памятника лемківской спільноты то в найвекшій мірі заслуга проф. Олены Дуць-Файфер і єй спілпрацы з локальныма властями.

Духовны справоздали жытя єпархіі

10. мая 2025 р. в Ґладышові в будинку Православного Осередка Милосердя «Елеос» одбыла ся дорічна конференция духовенства Перемышльско-Ґорлицкой Єпархіі. Єгомості выголосили справописы з жытя єпархіі та поєдных деканатів, з діяльности Єпархіяльного Осередка Православной Культуры «Ельпіс» в Ґорлицях, Єпархіяльного Осередка Милосердя «Елеос» в Ґладышові, Єпархіяльного Дому Дітины, Мужского Монастыря в Высовій ци діяльности Братства Православной Молодежы. Принято проґрам єпархіяльных упамятнінь 100. річниці обявлінь на Св. Горі Явір, принято ґрафік єпархіяльных торжеств, поломництв, омовлено справы ремонтів памятниковых церкви та будовы храмів в Ґладышові і на Святій Горі Явір. Підсумувано тіж великопістну благодійну акцию і признано фінансову поміч потрібуючым. Архієпископ Паісий, з благословліня котрого проходила конференция, на конец стрічы подякувал духовенству за службу Церкви і пожелал сил на дальшу душпастырску роботу.

Концерт «Вечеря дла Мариі» ся не одбуде

Моніка Бабуля, директорка Ґмінного Осередка Культуры в Устю Рускым, поінформувала посередництвом офіцийного профілю той інституциі в соспільных медиях, што того рока концерт «Вечеря дла Мариі» на Святій Горі Явір ся не одбуде. Орґанізатор концерту не достал позволіня на його реализацию од церковных власти. Основом дотеперішніх концертів была презентация марийных пісен з чытаньом вершів на сцені зорґанізуваній перед дверями храму каплиці. В попередніх едициях презентували ся м.ін. Ґалицийскій Хор з Высовы, Хор Cantores Carvatiani з Ґорлиц, Оркєстра Дыховых Інструментів з Брунариі, Меджепоколіньова Театральна Ґрупа Племя, солистка Юлия Дошна ци диет Вспак.

Будова вежы на Святій Горі Явір – ситуация без зміны

Вчера на Святій Горі Явір прошла стріча провіріня на місци в справі плянуваной будовы видоковой вежы. Стріча одбыла ся на внесок грекокатолицкого архієпископа і митрополиты Євгена Поповича. Присутны были м.ін. Директор Реґіональной Дирекциі Державных Лісів в Кракові, війт Ґміны Устя Рускє Eва Ґарбовска-Ґура, Надлісничый з Надлісництва Лося Бартломєй Солтыс, о. Ярослав Чухта, о. Григорий Пацан, о. Петро Качмар та чысленні згромаджена лемківска спільнота. Думкодавці інвестициі дале підтримуют концепцию, подля котрой вежа находит ся парусот метрів од каплиці і новобудуваной церкви. Част лемківской страны – в тым представникы Стоваришыня «Руска Бурса» в Ґорлицях – незмінено высловили свій спротив, підкрисляючы символичне і духове значыня цілой горы як місця культу. Лемкы апелюют одступити од інвестициі в тым місци.