Сумар дня на 13. червця/юнія 2025 р.

Приносиме вам сумар медияльной ґрупы ЛЕМ.фм+ на ден 13. червця/юнія 2025 р.

Зачал ся XVIII Світовый Конґрес Русинів

Днес, 13. червця/юнія офіцияльно зачынат ся в Букарешті XVIII Світовый Конґрес Русинів. Засіданя тогорічного конґресу проходит в просторах румуньского парляменту. Бере в ним участ приблизно 100 делеґатів і гостів з членьскых держав. Лемковину репрезентуют члены Стоваришыня Лемків і Стоваришыня «Руска Бурса» в Ґорлицях. В рамках святочного одкрытя конґресу заплянуване єст і вручыня нагорід в обшыри культуры ім. Василя Турока-Гетеша і за умелецку творчіст ім. Івана Манайла, як тіж почестны грамоты Рады Світового Конґресу для юбілятів русиньского руху. Першого дня члены Світовой Рады Русинів будут справоздавати діяльніст Світового Конґресу Русинів за послідні два рокы, так само як кажда членьска орґанізация зреферує, што діяло ся в каждій з держав, в котрых активны сут поєдны стоваришыня. Справоздавати будут ся і председы поєдных конґресовых Комісий. Другій ден то головні выборы на новый період – конґресовых Комісий, єй председів та членів і председы самой Світовой Рады Русинів. В пляні єст приняти і Выголошыня делеґатів 18. Світового Конґресу Русинів про признаня прав Підкарпатскым Русинам на свобідне хоснуваня русиньского языка та іх достоменности.

Дакотры лісовы ґрунты в Креници змінят перезначыня на нелісовы ціли

На обшыри ґміны Крениця будут одлісены 23 гектары ґрунтів. Як подал бургомайстер Крениці Пьотр Рыба, завдякы тому має ся одкрыти простір під інвестициі на найблизшых парунадцет років. Тема процесу зміны перезначыня лісового ґрунту на нелісовы ціли звязана єст з творіньом самоурядом загального пляну просторного заґаздуваня Крениці. Не значыт тото, што лісы будут вырубуваны, а лем же терены змінят своє перезначыня. Позволит то на реализацию важных проєктів. Серед пропозиций бургомайстра сут штучно мороженый санечково-бобслейово-скелетоновый тор, вежа до санечковых стартів, розбудова водного парку, ци дальшы інвестициі на ґондольовій желізниці, новы паркінґы і дорогы. Як подал бургомайстер, в самоуряді не бракне зеленых обшыри. Ґміна і місто Крениця фурт будут в близко 70% лісовым тереном. Окрем того близко 20% то рільничы терены, паркы і лукы, а забудова то близко 10%. Процес зміны перезначыня буде тыкал не лем ґрунтів належачых до ґміны, але і приватных теренів, о котры внескували жытелі.

Лемківскій вечер в Коросняньскій Публичній Бібліотеці

Припоминаме, што уж днес од 17.00 год. в Коросняньскій Публичній Бібліотеці буде проходила подія пн. «Лемківскій вечер в бібліотеці». Бібліотека реализує проєкт «Місця, люде, ремесло – спадковина реґіону» і запрашат до себе на розмаіты подіі і стрічы, звертат при тым увагу на історичный, народный і природничый потенциял коросняньской обшыри. Попередні стрічы тыкали м.ін. лемківской кухні ци дворів днешнього підкарпатского воєвідства, были і варштаты. На днешній стрічы о церквах, якы в жытю Лемків занимают особливе і выняткове місце, буде оповідал Даміян Новак – культурознавця, реґіоналиста і історик. Прелекция попередит концерт Оркєстры Святого Миколая з Люблина.