Сумар дня на 23. червця/юнія 2025 р.

Приносиме вам сумар медияльной ґрупы ЛЕМ.фм+ на ден 23. червця/юнія 2025 р.

28. Медженародный Фольклористичный Фестіваль «Світ під Кычером»

Уж в тым тыжни зачне ся 28. едиция Медженародного Фольклористичного Фестівалю «Світ під Кычером». Подія популяризує богатство традиций, музикы і танця великых і малых народів світа. Тогорічна едиция, слідом попередніх років, одбуде ся выключні на західніх землях. Концерт одкрытя одбуде ся в найблизшу пятницю 27. червця/юнія в Ліґницкым Поли. В наступных днях короводы і концерты будут в Олесници, Лісци, Ліґници, Поляници, Рудній, Польковицях і в Шпротаві. Фіналовый концерт пройде 6. липця/юлия в Ліґници. Вчас тогорічной едициі презентувати будут ся ансамблі з Арґентины, Пілнічной Македоніі, Ґвінеі, Портуґалиі, Костарикы, Украіны, Косова і Канады. З лемківском спадковином запрезентує ся ґазда – ансамбль Кычера. Дві попередні едициі фестівалю (з 2022 і 2023 років) Медженародна Федерация Фестівалів FIDAF узнала за єдны зо штырьох найліпшых на світі. Меценатами фестівалю сут: Міністерство Культуры і Нацийональной Спадковины, Міністерство Внутрішніх Справ і Адміністрациі, Фундация KGHM та Нижньошлезскє Воєвідство. Головным орґанізатором фестівалю єст Лемківскій Ансамбль Пісні і Танця Кычера.

64. Фестіваль русиньской культуры «Червена ружа» в Рускым Керестурі

Як інформувала новинарско-выдавательна установа Рускє Слово, в найблизщшу пятницю 27. червця/юнія в Рускым Керестурі в Сербіі зачне ся 64. Фестіваль русиньской культуры «Червена ружа». Проґрам потырват два дни. Першый ден фестівалю зачне ся Змаганями о найкрасшый голос, в котрым фахове жырі буде оціняло выконаня народных співанок. Пак одбуде ся конкурс новых композиций в забавным духу. Жырі выбере найліпшу композицию, інтерпретацию і найліпшый текст. Другого дня фестівалю одбуде ся проґрам для наймолодшых «Червене пупче», в рамках якого так само пройдут змаганя на найліпшу нову композицию. Дальше, в рамках проґраму «Одгукы ровнины» публика буде годна обзерати выступы русиньскых ансамблів з Сербіі і Хорвациі. Орґанізатором Фестівалю єст Дом Культуры Рускій Керестур, а спілфінансували го Општина Кула, Нацийональный Совіт Русинів, Міністерство Культуры і Інформациі Республикы Сербіі і Покраінскій секретарият за культуру, публичну інформацию і реляциі з реліґійныма спільнотами.

56. Фестіваль русиньской культуры «Еха Волчых Гір» в Уличы

А о нецілый місяц, в днях 18.-19. липця/юлия, в русиньскым селі Влич на Словациі одбуде ся дальша едиция Фестівалю Еха Волчых Гір. Фестіваль русиньской культуры в селі Влич є найстаршым фестівальом в Сниньскым реґіоні. Його початкы сігают 60. років ХХ столітя. Є святом русиньской культуры, традицийного ремесла і жытя в гармоніі з природом. Фестіваль орґанізуваный єст в унікатным оточыню Нацийонального Парку Полонины, знаного з найтемнійшого неба на Словациі і стародавных буковых пралісів. Цілю Фестівалю єст презентувати, заховувати і славити русиньску культуры з ріжных реґіонів Словациі і заграниці. Богатый проґрам подіі принесе выступліня фольклорных ансамблів, співацкых ґруп, солистів, як і концерты сучасных музикантів, котры інспіруют ся народныма мотивами.