Сумар дня на 3. липця/юлия 2025 р.

Приносиме вам сумар медияльной ґрупы ЛЕМ.фм+ на ден 3. липця/юлия 2025 р.

В суботу зыйдеме ся на Святій Горі Явір, пак в Рускій Бурсі в Ґорлицях

Вчера, 2. липця/юлия выполнило ся 5 років од смерти бл. п. Богдана Ґамбаля, выдатного лемківского діяча, єдного з основателів одновленой ґорлицкой Руской Бурсы і думкодавці першого лемківского радия ЛЕМ.фм. З той причыны хочеме запросити вас на дві стрічы, якы будут присвячены його памяти. Одбудут ся они уж в найблизшу суботу, 5. липця/юлия. О год. 11:30 на Святій Горі Явір буде правлене в місцевій каплици богослужыня. Пак, о год. 14:30 просиме вшыткых на споминову стрічу до Руской Бурсы в Ґорлицях, де будеме споминати спільны моменты з Покійным Богданом Ґамбальом. Хочеме вернути ся до його думок, діяня і присутности – не лем як до споминів, але як точкы однесіня для того, што є днес.

Глядаме потомных люди з фотоґрафіі

Стоваришыня Саґа Ґрибів раз іщы звертат ся з закликом о поміч в розпознаню осіб на знимці, якы найдут ся на муралю, котрый рыхтує артиста Аркадиюш Андрейков. Мураль малюваный є на стодолі в Білій Нижній недалеко ґрибівского дворця. Там, в 1947 році Ян Свідерскій принял до себе і ночувал лемківску родину, яка ждала на выселіня. Знимку з цілом громадом – Лемками і польскым ґаздом, заховал його внук Юзеф Свідерскій, якій заініциювал намалюваня упамятняючого муралю на своій посесиі. Кєд не поведе ся зідентифікувати осіб зо знимкы, дескаль буде символичным упамятніньом вшыткых Лемків, жертв насильной акциі «Вісла», якы ждали на выгнаня як раз на ґрибівскым дворци. Там зганяли Лемків з Фльоринкы, Вафкы, Білцаревы, Боґушы, Королевы Руской, Бересту, Полян, Брунар, Ставишы, Перункы, Чырной, а тіж з Мохначкы і Поворозника. Знимку, як і шыршый опис темы – найдете на нашым портали.

Стоваришыня Лемків пише в справі Горы Явір

Стоваришыня Лемків оприлюднило на своім вебсайті писмо тыкаюче справы звязаной зо Святом Гором Явір. Є оно протестом проти плянам побудуваня на Яворі тзв. видоковой вежы. Писмо было наперед послане до Проґраму Інтерреґ Польща-Словация. Піднесено в ним, што гора Явір то выняткове місце для Лемків і што тзв. консультациі были ведены без участи орґанізациі. Стоваришыня Лемків апелює о стриманя реализациі проєкту буводы вежы, при пошануваню прав нацийональных і етнічных менын, а точнійше права лемківской меншыны до історичной памяти і культивуваня своіх традиций. Орґанізация подала, што в цілости поперат в тій справі і становиско Стоваришыня «Руска Бурса» в Ґорлицях – партнерской орґанізациі.

Лемківскій Кєрмеш в Заменицях

В найвлизшу суботу, 5. липця/юлия в Заменицях на Нижнім Шлеску одбуде ся Лемківскій Кєрмеш. Подія пройде при місцевій грекокатолицкій церкви св. Йоана Крестителя. Кєрмеш зачне ся о 15.00 год. богослужыньом за мир на світі. Пак буде зложене квітя під памятником жертв акциі «Вісла». О 16.00 год. початок культурного проґраму – выступлят м.ін. Ластівочка, Розтока, Лемко Тавер, Троянда, Лемкус, але тіж два ансамблі, якы берут в тых днях участ в Медженародным Фольклорным Фестівалю «Світ під Кычером». Лемківцкій Кєрмеш в Заменицях орґанізуваный є од років. Хоц грекокатолицка Церков в Польщы в 2023 р. перешла на новый календарный стиль, то заменицкій Кєрмеш дальше одбыват ся в часі близкым до праздника св. Йоана за юлияньскым рахуваньом.