«Слово» – 6-та неділя по Сошествії Святого Духа – неділя, 9.00 год.

Коли Ісус Хрістос выздравив двох опанованых демонами – леґіоном демонів (то є велике множество лукавых бісів), ціле місто вышло посмотрити. А як увиділи тых двох людей выздравленых, но їх стада свинь пропавшы, просили Ісуса, жебы одышов з їх края.

Ісус одышов од них, насів до лодькы, і пришов до Капернаума. Він пришов дати правдиву слободу, але решпектує слободный выбер каждого чоловіка. Діавол баламутить чоловіка фалшивов слободов гріха. Указує чоловіку – роб, што хочеш, не дай ся обмеджовати никым ани ничім, вшытко є тобі доволено. То є наука, котра є приваблива, но насправды, она веде не до слободы, але до рабства.

І днешнє слово нам указує Хріста як ослободителя. Ісус пришов до Капернаума. Там, коли быв в даякім домі, принесли невладного, паралізованого, котрый сам ся не міг поставити. Його тіло было невладне. Четверо людей з великов віров приношать його перед Ісуса. А Ісус, видячі їх віру, говорить тому невладному.

Ісус видиів їх віру. Віру, же Хрістос може дати йому здравя. З тов віров они ідуть. Не заставить їх ани барьєра множества людей. Выношають го на стріху, а через діру в повалі спущають того невладного прямо перед Ісуса. А Коли Ісус тото видів, не повів тому невладному: Встань, будь здравый, берь свою постіль. Бо Ісус видів іщі дашто інше, то, што нихто ани з тых людей не видів.

Ісус видів іншу паралізу, котра важніша од той тілесной. Была то параліза в душі, котру робить гріх. А прото повідать слова: Довіряй, дітино, одпущають ся тобі твої гріхы. Ісус выздравлять того чоловіка, але не так, як очекює народ. Выздравив його душу од рабства гріха. Приніс тоту правдиву слободу. Люде чудують ся: Што Він говорить? Были там і фарізеї і учітелі закона. А они у своїх сердцях ведуть діалоґы. Тот чоловік жневажать Бога. Узурпує собі тото, што належыть Богу.

Але Ісус видів. Видів їх думкы. А говорить їм наголос. Чом такы бісіды ведете у своїх седцях? Вы добрі говорите. Нихто не може одпущати гріхы окрем самого Бога. Але Я єм Бог, котрый пришов на тоту землю дати одпущіня, ослободжіня з рабства гріхів. Першым доказом є, же виджу вашы думкы. Передомнов є одкрыте вшытко. Виджу до людьского сердця. А жебы вы знали, же сын чоловіка мать тоу владу на землі, повів Ісус невладному, котрый уж быв выздравленый на душі: Встань берь свою постіль а ідь. А його слово ся такой выповнило ділом. Тот чоловік встав і одышов здравый на тілі.

Дорогы радіослухачі, якы радостны і повны потіхы слова зазвучали в днешнім слові: Жебы вы знали, же Сын чоловіка мать владу одпущати гріхы, ослободити нас з рабства гріха, смерти. Пришов подати нам слободу о правдивого рабства. Але од нас чекать лем то, жебы прияти тоты слова, увірити їм, прийти ку Ісусови а повісти: Хочу, Господи, ослободжіня. Без огляду, як довго є чоловік звязаный рабством гріха і діавола. А і над нами зазвучіть тото радостне слово: Довіряй, одпущають ся тобі твої гріхы. Слава Ісусу Хрісту!

В неділю, 20. юла 2025 р., о 9.00 год. проґрам «Слово», котрый реалізує єромонах Маркіян, ЧСВВ. Повторіня 20. юла 2025 р. о 12.00 год. і 21. юла 2025 р. о 2.00 год. за русиньскым часом.