Вышла книга о Меджілабірцях із пера Володиміра Противняка

Володиміра Противняка знаме як бывшого председу Русиньской оброды на Словеньску ці секретаря Світового конґресу Русинів. Родак із Выдрани, днесь містьской части міста Меджілабірці, недавно выдав книгу, котра занимать ся історійов того русиньского міста на северовыході Словакії.

Меджілабірці в дзеркалі історії (Medzilaborce v zrkadle dejín), то 566-сторінкова публікація, котру выдало місто Меджілабірці, і святочно єй одпрезентовали почас 63-го річника Фестівалу културы і шпорту, якый в місті проходив на кінцю юна 2025-го року.

„Автор як довгорічный робітник Містьского уряду в Меджілабірцях, посланець, гражданьскый актівіста, председа общественных орґанізацій быв частков діяня в місті, і то му уможньовало орьєнтовати ся в нелегкій задачі. На книжці робив сім років, черьпав із доступной літературы, двох десяток кронік міста Меджілабірці, гражданьскых здружінь, колектівів, школ і множества особных розговорів,“ пише выдаватель.

Публікація має 37 капітол, є доповнена коло 900 фотоґрафіями, якы суть скапчаны із обсягом. „Є богатов выповідьов захоплюючов історічны меджі в жывоті обывателів міста.“

Тота унікатна книга о Меджілабірцях чітателів проведе сталітями, од першых писемных згадок аж по сучасность, і розкрыє скрыты історії, котры формовали Меджілабірці і їх обывателів, інформує місто.

Як далше чітаме в анотації, в книзі пише ся о вызначных діях і переломных моментах, котры овпливнили історію міста, суть в ній цінны знимкы і історічны документы, познакомити ся вдяка ній мож із вызначныма особностями, котры народили ся або діяли в місті, і лишыли по собі незмазательный слід.

„Тота книга є веце як лем історічна публікація. То одданя чести нашому місту і його людям. Ідеална є про каждого, хто інтересує ся історійов, про родаків, але і про турістів, котры ліпше хоять спознати Меджілабірці.“ Книжку мож дістати на Містьскім уряді в Меджілабірцях.