Сумар дня на 4. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 4. серпня/авґуста 2025 р.

В тым тыжни пройде 45. Лемківска Ватра на Чужыні

Уж в тым тыжни, в од пятниці 8. до неділі 10. серпня/авґуста в Михалові на Нижнім Шлезску буде проходила ювілейна 45. Лемківска Ватра на Чужыні. Пятницьовый проґрам зачне ся о 19:00 год. Того дня на сцені запрезентуют ся Ластівочка з Пшемкова, Зоря з Устя Руского, Студенка з Калуша (Украіна), Серенча з Ґорлиц, Дуляровы Братя з Ґорлиц і Інтраде. В суботу проґрам ватры выстартує о 13.00 год. На сцені запрезентуют ся Кычерка з Ліґниці, Ластівчата з Пшемкова, польскій ансамбль Малы Ґожовякы, якій вказує і лемківскій фольклор, Студенка з Калуша, Тераборсук з Пряшова та Кычера з Ліґниці. В суботній вечер ансамбль Ластівочка запрезентує пєсу «Дружбівскій Вечер». Забаву заграют два лемківскы ансамблі – Троянда і Водограй. В тым році, окрeм концертiв, варштатів i спільнотового святкуваня, орґанізаторы – Стоваришыня Лемків, зас зрыхтували Зону Дискусий i Выміны Поглядів, то є одкрыту простiр до бесід о лемкiвскій достоменности, істориі, культурі і традициях. Вступне на ватру мож придбати уж тепер онляйн через сайт Стоваришыня Лемків, або в касі в ден Ватры – лем за готівку. Заохочаме до участи!

Новый директор меншынового фонду СР. Процес выбераня критикуваный як нетранспарентный

Новым директором Фонду на підпору культуры нацийональных меншын Словацкой Республикы од 1. серпня/авґуста тр. остал Ян Штовка. На основі конкурсу го до функциі выменувала міністерка культуры Мартіна Шімковічова. Цілый процес выбераня нового директора меншынового фонду є критикуваный як нетранспарентный. Політична партия Magyar Szövetség – Мадярска Алиянция в справі цілого выборового процесу уж звернула ся з поданьом до Ґенеральной Прокуратуры Словацкой Республикы. Окрем того поданя приготовили і дакотры члены Рады Влады Словацкой Республикы про нацийональны меншыны – Палаты нацийональных меншын. Поданя з боку меншын дефініює три проблематичны обшыри – нетранспарентный поступ, порушыня або обходжыня закону, і недостаточна участ нацийональных меншын в цілым процесі. Веце на тоту тему чытайте на нашым портали.

Неодолга рушыт продаж білетів на показ лемківской оперы «Голос» в Кракові

О тыжден, 11. серпня/авґуста рушыт продаж білетів на черговый показ лемківской оперы «Голос». Спектакль верне на сцену 7. вересня/септембра, тым разом буде мож го обзерати в Краківскій Опері. Премєра лемківской оперы «Голос» одбыла ся кінцьом минулого рока в Нацийональным Форум Музикы во Вроцлаві. Проєкт стрітил ся з барз великым заінтересуваньом, зато білеты на премєровы спектаклі выпродали ся в нецілых 20 минут. Тым разом купити вступне мож буде онляйн або в касах Краківской Оперы – од понеділька 11. серпня/авґуста од 11.00 год. «Голос» то проєкт композиторкы Дариі Кузяк, якій лучyт в собі сучасну музику з лемківском народном музиком і електроніком. Сценічна презентация закладат участ двох вокалисток, лемківской капелі, оркєстры з дириґентом, танцюристів з Лемківского Ансамблю Пісні і Танця «Кычера» і сучасных. Дрібниці найдете на фейсбуковым сайті лемківской оперы «Голос».