Сканзен в Бардейовскых Купелях святкує 60 років

Найстаршый сканзен на Словакії, котрый належыть під Шарішскый музей в Бардейові, святкує 60 років. Як інформовало Одділіня комунікації Пряшівского самосправного краю, свої народенины одсвяткує в неділю 10-го авґуста 2025-го року, коли чекать на навщівників богатый проґрам.

Меджі обєктами, котры суть в Експозіції народной архітектуры, ся мож тішыти на ремеселників, музикантів і саджіня оріха кральовского.

Експозіція народной архітектуры в Бардейовскый Купелях одкрыла свої браны першый раз кінцьом авґуста 1965-го року. Наперед там было шість обєктів, днесь їх уж має 29, і вєдно презентують шыроку шкалу деревяных будов і способу жывота і бываня в історічных реґіонах Шаріш і Земплін, в тім чіслі в русиньскых селах.

Сканзен – юбілант, котрого зряджовательом є Пряшівскый самосправный край, дістане з нагоды свого юбілея дакілько подарунків.

Першым є проходяча реконштруцкія стріх двадцятьох найвекшых обєктів вдяка проєкту і підпорі з проґраму Interreg Польща – Словакія. Другым подарунком є уточніня датованя выбраных обєктів дендролоґічнов методов, чім ся здобудуть даны, ці найстаршый обєкт сканзену, котрым є дзвоніця із Янонець, быв справды збудованый коло року 1700. Третім подарунком є уж спомянута неділня ослава, в рамках котрой буде і музичный проґрам.

Сканзен в Бардейовскых Купелях має веце унікатів. Вєдно із зрубовыма деревяныма хыжами, пелевнями і сыпанцями із перелому 19-го і 20-го столітя перезентує веце дорогоцінностей. Як єдиный на Словакії має два деревяны храмы – Церьков святого Николая Чудотворця із 1755-го року, котра была до сканзену перенесена із села Збой, і Церьков Покровы Пресвятой Богородіці, котра была збудована у 1730-ім році в Никловій (днесь Мікулашова).

Гордити ся може і унікатным технічным заряджіньом, свердликом на выробу деревяных водоводных рул, а вдяка фунґуючій репліці гончарьского пеца перезентує жыву гончарьску традіцію, яка сягать аж до року 1475, коли быв основаный 1-ый гончарьскый цех на теріторії днешньой Словакії.