Сумар дня на 18. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 18. серпня/авґуста 2025 р.

Вмер єромонах Яків (Ярослав Мадзелян)

Як поінформувала Свято-Успеньска Унівска Лавра, 16. серпня/авґуста, на 75 році жытя вмер єромонах Яків (Ярослав Мадзелян), грекокатолицкій священник, основатель молодіжного руху «Сарепта» в Новици, бывшый адміністратор Команчы, пак парох Высовы, Устя Руского і Ґладышова. Покійный єромонах Яків народил ся 17. вересня/септембра 1950 р. на земли выгнаня – в селі Кеншыці, близко Зеленой Горы, де по 1947 р. в наслідстві акциі «Вісла» пришло жыти його родичам. Няньо – Григорий Мадзелян, походил з Чертіжного, мати – Любомира з Павуків, з недалекых Ізб. Ярослав Мадзелян был першым повоєнным грекокатолицкым священником, што одраз зачал служыти на грекокатолицкых парохіях, без служыня в латиньскым обряді. Веце про блаженной памяти єромонаха Якова прочытате в дописі на нашым портали. Вічна памят.

Нижньошлезскы копальникы путуют на св. Гору Ґрабарку

Ближат ся шторічны торжества на св. Горі Ґрабарці. Православны вірны з цілой Польщы фурт ідут в поломництвах на св. Гору Ґрабарку, де будут разом празднувати свято Преображыня Господнього. Каждого рока торжество притігат десяткы тисячів поломників, вірных і гости. Традицийно присутны сут вшыткы єрархы Польской Автокефальной Православной Церкви. В тым році, першый раз, на св. Гору Ґрабарку путує поломництво нижньошлезскых копальників, з благословліня владыкы Юрия, архієпископа вроцлавско-щеціньской єпархіі Польской Автокефальной Православной Церкви. Поломництво выіхало 17. серпня/авґуста спід православной церкви Святой Тройці в Любіні. Днес, в передден свята поломникы перейдут піше з Сємятич в підляшскым воєвідстві на св. Гору Ґрабарку, де возмут участ в святочных богослужынях. Поломництво своім патронатом обняла компанія KGHM. Капеляном копальників єст о. прот. Богдан Репела, любіньскій парох. Дрібниці найдете на сайті любіньской парохіі.

Санкова хоче одшкодуваня за інфраструктуру знищену сильным дощом

Санкова старат ся о одшкодуваня за страты понесены в результаті сильных дощів, котры перешли над ґміном на зламі червця/юнія і липця/юлия. Страты были вычыслены на близко 1 млн 200 тис. злотых. Ушкоджены были предовшыткым дорогы і перепусты. За війт ґміны Санкова Малґожатом Малух, одкрыта была одповідня процедура цілю здобытя одшкодувань. Внесок был скєруваный до воєводы. Як подала війт Санковой, дорогова інфраструктура была знищена на тильо, што не сут в силі направити вшыткы шкоды з власного буджету. Сильны дощы перешли над цілом ґміном, але найбарже ушкодили дорогы в Санковій, Маластові, Мацині Великій, Вапенным і в Бортным.

«Никыфор. Пасия Творіня»

До кінця того місяця в Conneisseur Kraków – Салоні Творів Штукы мож обзерати выставу творчости Епіфана Дровняка пн. «Никыфор. Пасия Творіня». Выстава проходит з нагоды 130. річниці народин артисты і презентує 130 його прац, в тым вельо рідкых творів: м.ін. вчасны композициі з 20. років ХХ столітя, виды внутрі кухні з 30. років ци єдну з найвекшых форматово прац маляря. Выставу мож обзерати в годинах отвертя ґалериі до кінця серпня/авґуста. Некотры працы сут выставлены на продай. Ґалерия передвидує тіж печатаня альбому.