Сумар дня на 21. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 21. серпня/авґуста 2025 р.

Порядкуваня цмонтеря в Радоцині

Недавно інформували сме о тым, што Клюб Любителів Лемковины орґанізувал порядкы на цмонтери в Чорным і при памятнику Талергофців при пути медже Чорным а Ясюнком. Дальшым етапом прац было упорядкуваня цмонтеря в Радоцині. Волонтеры позберали голузя, выкосили траву і єй позберали. Повело ся окорувати пару жерди, якы приготовило Стоваришыня Долина, што вышло з ініциятивом огороджыня цілости цмонтеря. В рамках діянь были сфотоґрафуваны вшыткы памятникы. Пару з них є пошкодженых. Была зроблена документация і прововреный іх актуальный стан. Заєдно порядкуваня цмонтеря в Чорным, як в і Радоциі фінансуване є з Нацийонального Інституту Спадковины.

Заран выйде грекокатолицкє поломництво на Святу Гору Явір

Іщы перед плянуваным поломництвом в сотну річницю обявліня на Горі Явір, в пятницю 22. серпня/авґуста вірны грекокатолицкой Церкви підут з нічным поломництвом зо словацкого Ґабольтова на Святу Гору Явір. Поломникы вырушат о 18.00 год., пак підут через Пітрову і Фричку на Пряшівскій Руси, жебы перейти до Ізб і Біличной на Лемковині. Одтамале выйдут на Гору Явір. 8. вересня/септембра 1925 р. три Лемкыні з Высовы вертали з посвячыня римокатолицкой каплиці в чехословацкым Ґабольтові. Вертали в ночы, бо хтіли неспостережены перейти через «зелену границю». По тым, як перешли на польску страну, клякли, жебы подякувати за щестливе поверніня. Як раз товды отримали надприродный знак, котрый был заповідьом дальшых дій.

Ден памяти Антония Бескіда в Русиньскым Музею

Словацкій Нацийональный Музей – Музей Русиньской Культуры в Пряшові рыхтує подію, яка буде посвячена вызначному політикови І пол. ХХ ст. – Антонови Бескідови. Як раз того рока выходит 170. річниця його народжыня. Лекция до той темы в музейных просторах одбуде ся 18. вересня/септембра о 16.00 год. Антон Бескід вродил ся 16. вересня/септембра 1855 р. в Ганиговцях (товдышнє Мадярскє Королівство). Был русиньскым правником, другым ґубернатором Підкарпатской Руси.

Поломництво вірных православной Церкви на праздник Максима Ґорлицкого

Вірны православной Церкви рыхтуют ся до праздника священномученика Максима Ґорлицкого. Як раз з благословіня архієпископа Паісия, владыкы перемышльско-ґорлицкого, 5. вересня/септембра одбуде ся VIII піше поломництво з рідного села Максима Сандовича – Ждыни, до Ґорлиц. Поломництво зачне ся о 5.00 год. рано в церкви Покровы Пресвятой Богородиці, в котрій был хрещеный св. Максим. Там буде служена Божеска Літургія. Пак поломникы підут через Ґладышів на Маґуру, до Маластова, Ропиці Руской, через Сенкову і Сяры до Ґорлиц. О 17.00 год. в катедральній церкви в Ґорлицях буде правлена Всеночна. Зголошыня мож подавати до 4. вересня/септембра до Братства Православной Молодежы Перемышльско-Ґорлицкой Єпархіі.