Юбілуючій ПУЛС іде як головный пункт проґраму до японьской Осакы

Професіоналный русиньскый ансамбель – Піддукляньскый умелецькый людовый субор (ПУЛС), тот рік святкує 70 років од свого выникнутя. Як інформовало Одділіня комунікації Пряшівского самосправного краю (ПСК), котрый є зряджовательом ансабмлю, ПУЛС при тій нагоді на кінцю того року одпремєрує новый ціловечурный проґрам.

ПУЛС за 70 років свого існованя выступав у многых країнах, а нелем на европскім контіненті. Уж в найблизшых днях із своїм репертоаром представить ся на світовій выставі EXPO 2025 в японьскім місті Осака, де буде головным пунктом ґалапроґраму почас Народного дня Словакії.

Ансамбель свю історію почав писати у 1955-ім році як Піддуклянський український народний ансамбль, і быв оперетов і балетом втогдышнього Українського націоналного театру в Пряшові. По тім, як з театру в 1990-ім році став русиньскый Театер Александра Духновіча, і ПУЛС змінив свою назву. Одокремив ся од театру у 2008-ім році.

За 70 років фунґованя одограв понад 10 тісяч домашніх представлінь, і десяткы загранічных выступлінь. Теперь буде Словацьку републіку ПУЛС репрезентовати в Японії в рамках выставы EXPO 2025. Як інформовало Одділіня комунікації ПСК, ПУЛС буде головным пунктом проґраму і выступати буде із найновішым проґрамом Скарбы.

Ансамбель буде в японьскій Осаці выступати почас трьох днів, офіціалный Народный день Словакії є напланованый на 10-ый септембер.

ПУЛС почас свойой 70-річной історії уж выступав у Великобрітанії, Булгарії, Данії, Франції, Голандії, бывшій Югославії, Канаді, Норвеґії, Польщі, Австрії, Німецьку, Швейцарії, Італії, Тунісії, США, бывшых країнах Совітьского союзу, а по розділіню Чехословакії і в окремій Чесьскій републіці.