Сумар дня на 28. серпня/авґуста 2025 р.

Приносиме вам сумар медияльной ґрупы ЛЕМ.фм+ на ден 28. серпня/авґуста 2025 р.

Підсумуваня волонтерскых робі Клюбу Любителів Лемковины

Як підсумувал вчера Клюб Любителів Лемковины, на завершыня тогорічных прац повязаных з порядкуваньом лемківскых цмонтерів, волонтеры выкосили траву на цмонтери в Долгым. Вчас варштатів участникы познали ближе історию Лемковины і іх жытелів. В Долгым спомянуто бл. п. Димитрия Сабатовича, якій як селянин Долгого через рокы плекял памят о тым селі. Як зазначат Клюб, в веденых діянях залежыт не лем на заанґажуваню люди до працы, але тіж переказуваню ім знаня о істориі, культурі і спадковині. Скорше Клюб вюл працы на цмонтерях в Радоциі і Чорным. Того рока серед волонтерів были особы Зеленой Горы, Пшемкова, Варшавы по Ґорлиці, Ґладышів і Креницю. Были тіж волонтері з Украіны. Опікуном варштатів был о. Роман Дубец. Акциі вели ся завдякы дофінансуваню Нацийонального Інституту Спадковины.

В парохіі в Рудній одбыл ся выклад на тему свідомости дотрумуваня постів

Як інформує православна парохія Воздвижыня Чесного Хреста в Рудній (вроцлавско-щеціньска єпархія ПАПЦ), 17. серпня/авґуста одбыла ся стріча, вчас котрой был выголошеный выклад на тему поглубліня свідомости дотримуваня постів. Модератором стрічы был настоятель парафіі о. митр. др Дарий Цьолка, а з выкладом выступил о. Адам Горбаль, парох Зимной Воды і Михалова. О. Горбаль приближыл історию посту і во вступі пригадал слова Ісуса Христа о потребі покаяня, без котрого спасіня не єст можливе. Піст є потрібный, бо свідчыт о высшых морально-аскетичных цілях жытя. Подля о. Горбаля то інструмент, што очыщат душу од страсти і веде до росту духового жытя чловека.

Русиньскій музей кличе на выставу до Прагы

Словацкій Нацийональный Музей – Музей Русиньской Культуры в Пряшові є спілорґанізатором выставы «Выходословеньска модерна – Сон о роднім краю», яка буде в ґалериі ЛапідаріуМ в Празі од 11. вересня/септембра до 6. жолтня/октобра 2025 р. Русиньскій музей на ній представит 21 образів од єденадцетьох русиньскых візуальных творців (малярів і фотоґрафів) з власных збірковых фондів музею. Додатково музей брал участ в выбераню дакотрых дальшыx русиньскых авторів з пілнічно-східньой Словациі. Вернісаж выставы одбуде ся 11. вересня/септембра о 18:00 год. в ґалериі ЛапідаріуМ в Празі. Подія є підпорена словацком амбасадом в Празі.

Поломництво на праздник священномученика Максима Ґорлицкого

Припоминаме, што вірны православной Церкви рыхтуют ся до праздника священномученика Максима Ґорлицкого. Як раз з благословліня архієпископа Паісия, владыкы перемышльско-ґорлицкого, 5. вересня/септембра одбуде ся VIII піше поломництво з рідного села Максима Сандовича – Ждыні, до Ґорлиц. Поломництво зачне ся о 5.00 год. рано в церкви Покровы Пресвятой Богородиці, в котрій был хрещеный св. Максим. Там буде служена Божеска Літургія. Пак поломникы підут через Ґладышів на Маґуру, до Маластова, Ропиці Руской, через Санкову і Сяры до Ґорлиц. О 17.00 год. в катедральній церкви в Ґорлицях буде правлена Всеночна. Зголошыня мож подавати до 4. вересня/септембра до Братства Православной Молодежы Перемышльско-Ґорлицкой Єпархіі.