Сумар дня на 8. вересня/септембра 2025 р.

Приносиме вам сумар медияльной ґрупы ЛЕМ.фм+ на ден 8. вересня/септембра 2025 р.

Лемківска опера «Голос» в Кракові

Вчера, 7. вересня/септембра в Краківскій Опері презентуваный был черговый показ лемківской оперы «Голос». Премєра оперы одбыла ся кінцьом минулого рока в Нацийональным Форум Музикы во Вроцлаві. «Голос» то проєкт композиторкы Дариі Кузяк, якій лучыт в собі сучасну музику з лемківском народном музиком і електроніком. Сценічна презентация закладат участ двох вокалисток, лемківской капелі, оркєстры з дириґентом, танцюристів з Лемківского Ансамблю Пісні і Танця «Кычера» і сучасных. А 22. листопада/новембра «Голос» мож буде видіти в Варшаві. Рушыла уж продаж білетів на сайті Музею Істориі Польщы. Дрібниці найдете на фейсбуковым сайті лемківской оперы «Голос».

Тырват голосуваня в конкурсі «Туристичны Скарбы Малопольщы»

Припоминаме, што до 15 вересня/септемба мож голосувати в конкурсі «Туристичны Скарбы Малопольщы». Цілю конкурсу єст нагородити найбарже атракцийны, новаторскы і приязны для туристів місця. Перше мож было зголошувати кандидатуры. Як і в попередніх роках, змаганя проходят в 6-ох катеґориях: місце з климатом, найбарже інтересуючый туристичный пут, подія, унікатова туристична атракция, одпочынок на селі і в гостині. Од початку вересня/септембра мож голосувати на пропонуваных кандидатів, серед них находят ся атракциі з ґорлицкого повіту. В катеґориі місце з климатом номінуваны сут Домініковіце, а в катеґориі унікатова туристична атракция – «Шляк катів» в Бічы. Для лявреатів зрыхтуваны сут фінансовы нагороды і участ в промоцийній кампаніі в 2026 році.

В Низкым Бескіді буде нова колиба

На Маластівскій Маґурі плянувана єст будова модерной колибы, котра буде важным пунктом на туристичній мапі гір. Актуально тырвают остатні процедуры звязаны з конкурсом оферт. Як передал презес заряду спілкы PTTK Karpaty, Мариюш Шевчык, до конкурсу зголосило ся 6 фірм, а будова повинна зачати ся в найблизшых тыжнях. Спілка закладат, што колиба буде готова до хоснуваня в першым кварталі 2028 рока. Новый будинок, хоц має быти модерный, буде вписаный в краєвид Бескіду. В середині найде ся аж 29 нічліговых місц. Колиба по части буде достосувана до потреб осіб з непелносправностями, а проєкт закладат застосуваня еколоґічных розвязань.

Ґорлицкій повіт ставлят на фотовольтаічну інсталяцию

Звязок Ґмін Ґорлицкой Землі кінчыт реализацию проєкту «Допосажыня водно-канализацийной інфраструктуры в фотовольтаічну інсталяцию». Інсталяциі побудувано при очыщальнях воды в Высовій, Ґорлицях, Мощеници, Липинках і Лужній та при стациях уздатняня воды в Бічы, Бобовій, Ропі і Вапенным. Інвестиция причынит ся до обнижыня коштів функцйонуваня стациі уздатняня воды як і очыщаня в реґіоні Ґорлиц. Задача реализуваня єст з середків Урядового Фонду Польскій Лад.

50 років істнуваня Сандецкого Етноґрафічного Парку

Сандецкій Етноґрафічный Парк просит на 50 років свого істнуваня. Святкуваня пройде в неділю 14. вересня/септембра в скансені і зачне ся о 11.00  год. од Службы Божой. В проґрамі находят ся концерты, а музичну част подіі одкрыє выступ Юлиі Дошны. На сцені запрезентуют ся тіж ансамблі Долина Попраду, Ковальня та Тереса Міргі з ромскым ансамбльом Кале Баля. Ціліст дополнят показы ремесла і ґаздівской роботы. Вступ дармо.