Iнавґурация проєкту FOSTERLANG в Вілямовицях

FOSTERLANG то новый проєкт фінансуваный Европейском Комісийом в рамках проґраму Горизонт Европа. Його ціль то підперти меншыновы языкы в Европі. Інавґурация проєкту і конференция одбудут ся в днях 25.-27. вересня/септембра в Вілямовицях, де до днес хоснуют вілямівскій язык (wymysiöeryś).

Вілямовиці не без припадок будут в роли европейского центра языковой ріжнорідности і ревітализаийных дій, будут гостити експетрів, котры занимают ся охороном і розвитком меншыновых языків з цілой Европы. Місто од років плекат традицию вельоязычности, котра выходит тіж з соспільных активности. Місто уж од долшого часу реґулярні гостит і підперат языковых активістів з Польщы і Европы, а тіж позаевропейскых держав.

Шотляндскій, ірляндскій, валийскій, каталоньскій, баскійскій, кашебскій, лемківскій і wymysiöeryś – то некотры з языків, котры будут репрезентуваны підчас подіі. Разом вказуют богатство і языкову ріжнорідніст Европы.

Конференция буде тіж нагодом для спільного святкуваня Европейского Дня Языків, котрый того рока припадат на 26. вересня/септембра.

Коордианторка проєкту, проф. Юстина Олько з Варшавского Університету, підкрислят: «Од близко двадцетьох років Вілямовиці, мале місточко, котре хоснує свій язык wymysiöeryś, то жывый центр языкового одроджыня і ефективности для одбудовы і того, жебы підперати свою етнічну і культурну достоменніст. Протягом років тота соспільніст притігала языковых активістів і заанґажуваных соспільных бадачів з цілого світа, што наслідувало інтенсивном сітю контактів, выміны досвідчынь і взаімых інспіраций».

«Соспільніст Вілямовиц дає надію, же аж і барз загороженый язык може найти своє місце в сучасным, зґлобализуваным світі, же локальный язык може причыняти ся до добростану соспільности і же його хоснувателі можут активно формувати свою реальніст».

«Тішу ся, же вілямівска спільнота згодила ся быти ґаздом початку проєкту FOSTERLANG. Наша спільна дія тыкат надіі і діяня в духу єдности в ріжнорідности, згідні з візийом Европейской Уніі, з котром вшыткы ся глубоко ідентифікуєме».

До тых слів навязує бадач і ревіталiзатор вілямівского языка, др Тимотеуш Круль: «Хоц мусиме ся вчыти інчых языків, залежыт нам, жебы все чути близко нас вілямівскій (в ориґіналі: Müswer oü ander śpröha łjyn, oder wymysiöeryś wełwer ind hjyn)».

Подія пройде в Музею Вілямівской Культуры в Вілямовицях в днях 25.-27. вересня/септембра 2025 р. В проґрамі находят ся м.ін. выступліня і варштаты з участю активістів і експертів з цілой Европы. Тема обнимат квестиі звязаны з ревітализацийом меншыновых языків (м.ін. вілямівского, лемківского, кашебского), меджепоколіньовым переказом загыбаючых языків та розвитком контестуваного языкового капіталу. Послідній ден подіі буде посвяченый баданям і ревітализациі вілямівского языка.

За лемківску меншыну на конференциі выступувати будут проф. Олена Дуць-Файфер, Анна Масляна та Наталия Малецка-Новак.

Проґрам конференциі доступный єст за тым мотуком: https://bit.ly/Fosterlang_START.