В Празі одрыли выставу Сон о роднім краю. Мож видіти русиньскых умелців

В четверь 11-го септембра 2025-го року в ґалерії Lapidárium в Празі одбыла ся вернісаж выставы під назвов Выходословацька модерна. Сон о роднім краю. Выстава была реалізована під покровительством Його Ексцеленції посла Словацькой републікы в Чеській републіці – Мартіна Мураньского, і Словацького інштітуту в Празі.

Тота выстава могла зреалізовати ся і вдяка выдатній помочі Словацького народного музея – Музея русиньской културы в Пряшові, котрый до той експозіції із свого депозітаря пожычів 22 образів од десятьох авторів. Цілково є на выставі наіншталованых 51 образів і фотоґрафій переважно русиньскых візуалных умелців.

„Ідея зорґанізовати тоту выставу в рамках ціклу Култура реґіонів Словакії зродила ся якраз на словацькій амбасаді в Празі за участи пані Светланы Калоусковой і представителів Словацького інштітуту в Празі, і про нас была велика честь стояти при реалізації той прекрасной думкы,“ інформовав русиньскый музей на своїм сайті на соціалній сіті Facebook.

Светлана Калоускова, котра є маїтельков ґалерії Lapidárium, є родачков із Пряшова, і має русиньске походжіня. Музей далше подяковав, же творы русиньскых авторів, котры сохраняють в своїм депозітарі, могли вказати в Празі.

В рамках експозіції, котра буде доступна до 6-го октобра того року, мож видіти мальбы, ґрафікы, текстілны роботы, добовы фотоґрафії, як і мотівы традічных кроїв, сакралной архітектуры ці просторовы іншталації.