Выголосили резултаты конкурзу Русиньска приповідка

Основна школа з матерьсков школов в Кленовій, з нагоды юбілейных 30 років од кодіфікації русиньского языка, 10-го фебруара 2025-го року выголосила літературно-вытварный конкурз про вшыткы школы на цілій Словакії, конкурз під назвов Русиньска приповідка.

Богатство каждого народа є в його народній словесности. Дотворює мозаіку пестрой културной дідовизны, а шпеціално приповідкы, котры творять дітині світ добра і зла, розвивають єй фантазію, і помагають заховати материньскый язык.

Школярі і штуденты школ могли в рамках конкурзу пером або фарбами розповісти хоцьяку приповідку, котру чули в радію або прочітали в книжці, припадно єй перед спаньом слухали з уст мамкы ці бабкы.

Цільом конкурзу было позітівно іншпіровати дітей і школярів, жебы в своїх вытварных або літературных творах выповіли своє чутя і постой ід русиньскій културі, народу ірусиньскій ідентіті.

Літературна часть проходила од 10-го фебруара до 9-го юна того року, жебы фахова жюрі мала достаток часу на прочітаня творів і оцінку. Вытварна часть проходила од 10-го фебруара до 31-го авґуста. Творы могли участници конкурзу принести до школы в Кленовій, або їх послати на адресу школы.

Оціньовали творы в штирьох катеґоріях

Конкурз проходив у штирьох катеґоріах –  1-ша катеґорія: матерьска школа, 2-га катеґорія: 1.- 4. класа основных школ (ОШ), 3-тя катеґорія: 5.- 9. класа ОШ, 4-та катеґорія: середні школы і ґімназії.

Школы насамперед выголосили школьскы кола, в котрых выберали в каждій катеґорії три найшумнішы творы. До цілословацького конкурзу поступили три творы в каждій катеґорії з каждого окресу.

В рамках конкурзу была зряджена тричленна жюрі з области літературно-вытварного уменя. Задачов жюрі было выбрати три вытварны творы з каждой катеґорії в рамках каждого окресу, котры поступлять до цілословацького конкурзу. Потім з них выбрала жюрі в каждій катеґорії три найкрасшы творы.

За літературну часть одповідны были председкыня – русиньска писателька Марія Ґірова, а членом жюрі была і ПаедДр. Светлана Цімбакова, учітелька нашой школы. За вытварну часть конкурзу одповідный быв предсeда пороты Іван Ґазій, учітель мальованя в Пріватній умелецькій школі Андрія Смолака в Снині, під доглядом самого академічного маляря Андрія Смолака.

Жюрі мала тяжку роботу, не было то легке. І наперек тому, же ся до конкурзу приголосило не тілько школ, як сьме чекали, творы, котры были загнаны, были барз шумны, і жюрі в дакотрых припадах мусила уділити і дві оцініня.

Святочне выголошіня резултатів у Кленовій

Славностне выголошіня резултатів конкурзу одбыло ся 18-го септембра в нашій школі. На нім зышли ся вшыткы, котры хотіли дістати нагороду за свою роботу.

Перед великым дньомм сьме приготовили нашу школу так, жебы місце, де будуть нагороджены участници конкурзу, было достойным. Андрій Смолак пожычів стояны на вытварны роботы, на котры сьме іншталовали цілу выставу вытварной части. А наша ходба ся такой змінила на ґалерію.

Святочну церемонію отворили нашы дівчата із нашого Вінчіка, котры заспівали і затанцьовали русиньскы співанкы. Пані директорка офіціално отворила тоту святочну подію. Вшыкты, котры собі пришли перевзяти нагороду, тішыли ся, і приобіцяли участь і в далшім році.

Подякованя

Дякуємє школам, котры брали участь в конкурзі і дали собі намагу підпорити своїх шкоярів, жебы ся залучіли до конкурзу. Шпеціалне подякованя належыть Основной школі з матерьсков школов Александра Духновіча Влыч, з котрой вышло найбівше писателів приповідок.

Заховати наш язык є наша найважніша річ в сучасній добі. В добі, коли дорослы забывають бісідовати по русиньскы із своїма дітми. А найлегше то зробити – через приповідку.

Резултаты конкурзу

Літературна часть

В літературній части в 1-ій катеґорії здобыв перше місце Мішко Буша з ОШ з МШ Кленова з приповідков За збойника Головатого. Нихто веце ся до конкурзу не залучів, што нас міцно мерзить.

2-га катеґорія

1. місце: Адам Михалко, ОШ з МШ А. Духновіча Влыч – Звунок з гор
2. місце: Ема Рідарьска, ОШ з МШ А. Духновіча Влыч – О Йосифови а заклятій студни
3. місце: Мартін Петровка, ОШ з МШ А. Духновіча Влыч – Неконечны камаратства

3-тя катеґорія

1. місце: Сімона Демянова, ОШ з МШ А. Духновіча Влыч – Ряба скала
2. місце: Емма Бобрикова, ОШ з МШ А. Духновіча Влыч – Вова з Ковбасова
3. місце: Нікола Сенкова, ОШ з МШ А. Духновіча Влыч – Статочный Юрко

4-та катеґорія

1. місце: Ліана Пастернякова, Споєна школа Ю. Геніша, орґанізачне одділіня Ґімназія в Бардейові – Гробарь злодійом а корчмарь ворожылником

Міморядне оцініня в цілословацькім конкурзі жюрі уділила Меланії Германовій – русиньскій писательці, за авторьску публікацію Люблю приповідку.

Далшым участникам жюрі уділила Почестну грамоту за літерарну творчость. Почестнов грамотов были нагороджены: Мартін Кокордяк, Татяна Греговчікова і Ян Балберчак, вшыткы трьоми з ОШ Александра Духновіча в Меджілабірцях, і Татяна Дынічова із Споєной школы Централна Свідник.

Вытварна часть

Вытварных творів пришло до конкурзу бівше як літературных. Жюрі оцінила вытварны творы так:

1-ша катеґорія

1. місце: Михал і Терезка Бушовы, ОШ з МШ Кленова – Збойник Головатый

2-га катеґорія

1. місце: Наталія Сурмайова, ОШ з МШ Кленова – Червена шапочка
2. місце: Сімона Ґрибова, ОШ А. Духновіча Меджілабірці – Лишка і вовк
3. місце: Тамара Пухірова, Споєна школа Централна Свідник – Неботрібнa xмара
4. місце: Лівія Швандова, ОШ з МШ Кална Розтока – Ванесчіны трампоты
5. місце: Софія Дубякова, ОШ з МШ Стащін – О златій рыбці
6. місце: Елізабет Штанар, ОШ з МШ Кленова – Прінцезна на горошку

3-тя катеґорія

1. місце: Карін Бузґова, Споєна школа Централна Свідник – Божы окулярї
2. місце: Біанка Іванчова, Споєна школа Централна Свідник – Петрова шапка
3. місце: Леа Ковальова, ОШ з МШ А. Духновіча Влыч – Як навчів бідняк пана брехати
4. місце: Татяна Дынічова, Споєна школа Централна Свідник – Слеменак і зяць
5. місце: Юрко Янко, ОШ з МШ А. Духновіча Влыч – Як сын нянька жобрати загнав
6. місце: Рената Дынічова, Споєна школа Централна Свідник – Слон і мышка

Міморядне оцініня жюрі уділила ОШ з МШ Кленова за вытварный твор О ріпі.

Почестнов грамотов были оцінены: Татяна Греговчікова, Ян Балберчак, Мартін Кокордяк, Елізабет Ґалісін, Нікола Сіланічова із ОШ Александра Духновіча в Меджілабірцях; Адела Гаркотова, Алжбета Зубкова, Нікола Сенкова, Матєй Зимовчак із ОШ з МШ Александра Духновіча Влыч; Юлія Зелізнякова, Аліца Маюрникова із Споєной школы Централна Свідник; Еміл Дудікотьо, Николай Ґороль, Марія Ґорольова із ОШ з МШ Кленова; Вероніка Турбакова, Мія Кереканічова, Тімеа Байзова, Маріянна Клепцьова, Хрісто Турбак, Іван Федоряк, Діана Турбакова, Володимір Федоряк із ОШ з МШ Кална Розтока.

Автор: Марцела Рунянинова