В Хорватії одбыв ся фестівал Кед голубица лєцела. Засідала і СРР

Почас вікенду 26-го і 27-го септембра 2025-го року в Петровях одбыв ся вже 15-ый річник фестівалу Кед голубица лєцела, котрого головным орґанізатором было Дружство Руснак, членьска орґанізація Світового конґресу Русинів.

З той нагоды одбыло ся в Старых Янковцях в суботу 27-го септембра і Друге засіданя Світовой рады Русинів, выконного орґану Світового конґресу Русинів у меджіконґресовім періоді. Своє засіданя в суботу мала і Світова рада русиньской молодежи.

Богатый проґрам

Як інформовав про аґентуру Рутенпрес Іван Лікар, културный фестівал почав уж в пятніцю проґрамом дітячой філклорной творчости під назвов Нашо искри. По нім наслідовав Меджінародный філмовый фестівал Русинів, на котрім быв премєрованый і куртометражный документарный філм Най ше не забудзе.

В суботу пополідне про участників была приготовлена выстава фотоґрафій під назвов Лєци, леци голубица, і пак наслідовав ґалапроґрам фестівалу Кед голубица лєцела в Домі културы в Петровцях. Тот рік собі почас ґалапроґраму припомянули і 10 років навчаня русиньского языка і културы на Основній школі Антуна Бауера у Вуковарі, котре было ініціоване Дружством Руснак.

Засідала СРР

В суботу дополідне одбыло ся Друге засіданя Світовой рады Русинів (СРР), на котрім взяли участь председа Штефан Лявинець із Мадярьска, Мартін Караш із Словакії, Ґеорґій Фірцак із Румунії, Михайло Фейса із Сербії, Ян Чопік із Чеськой републікы, Микола Бобинець із Україны, і домашній Мійо Шайтош.

СРР на своїм засіданю, окрем іншого, оцінила проходжіня 18-го Світового конґресу Русинів, якый одбыв ся в юні 2025-го року в Бухаресті, а так само были обговорены окремы пункты Резолуції, котра на конґресі была прията, але і далшы темы

Засіданя мала і молодеж

В суботу одбыло ся в Старых Янковцях і Третє засіданя Світовой рады русиньской молодежи (СРРМ).

Участь взяли предсидателька СРРМ Светлана Бойчук із Румунії, Александер Грічко із Словакії, Срдян Ґовля із Сербії, Матей Бурчак із Хорватії, і Вероніка Словікова із Чеськой републікы, котра заступалиа членку рады Яну Томкову.

На засіданю бісідовало ся о потребі змінити Штатут Світового форуму русиньской молодежи, кедьже од його реґістрації у 2004-ім році перешло много часу. Было добісідовано, же ся зробить робоча ґрупа, котра Штатут приготовить.

Обговорили ся і далшы пункты, меджі котрыма быв замір зорґанізовати в слідуючім році в Малім Липнику на Словакії 2-ый Інтернаціоналный табор Світового форуму русиньской молодежи, робота до далшого засіданя, а было выбрате лоґа форуму, котрого автором є Александер Грічко.