Сумар дня на 9. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 9. жолтня/октобра 2025 р.

Вернісаж выставы Давида Здобыляка в Новым Санчы

Уж заран, 10. жолтня/октобра в Малопольскым Центрі Культуры Сокіл в Новым Санчы одбуде ся вернісаж выставы лемківскых образів артисты др. Давида Здобыляка. «Може ся не верну / Może nie wrócę» – під такым наголовком Давид Здобыляк малярско запрезентує долю Лемків. Основом буде його родинна істория – істория діда Петра Коцура – якого увязнили в концтаборі в Дрезні, выселили на захід, де мусіл уложыти сой дальше жытя. Є то характерне для векшыны членів лемківской ґрупы – спільнота тых самых пережыть, памяти і болю, зато тота выстава буде близка емоциям каждого з нас. Давид Здобыляк то артиста польско-лемківского походжыня. Вродил ся в 1993 році в Хобєні на Нижнім Шлеску. Єст абсольвентом Академіі Красных Штук в Кракові, в працовни проф. Януша Матушевского і працовни рисунку проф. Ґжеґожа Вненка. Вчас вернісажу одбуде ся дискусия з артистом і специяльным гостьом – др. Михалом Шымко, бесіда буде тыкала презентуваного малярского циклю і контекстів лемківской штукы.

Карпаторусиньскій Ден 2025 в ЗША

Kарпаторусиньскє Общество в ЗША кличе на тогорічный Карпаторусиньскій Ден в ЗША. В рамках того одбуде ся дакілько подій. Пенсильванскє одділіня Общества орґанізує особливу тридньову серию презентaций, присвячену акциі. Ден Карпаторусинів в ЗША 2025 зачне ся 24. жолнтя/октобра о 18:00 год. Джеррі Юмба розповіст о різдвяных звыках і традициях. Наступного дня о 14:00 год. Дін Полока буде бесідувал о русиньскій музиці і проведе лекцию русинськых танців. 26. жолтня/октобра спілоснователь і почестный президент Карпаторусиньского Общества в ЗША Джон Ріґетті выголосит першу част трилекцийного циклю «Карпаторусины: складна істория, вызначна культура», під назвом «Русины: од початку до 1500 рока». Подіі будут проходити в Культурным Центрі Общесвта в Манголь в Пенсильваніі.

Кличеме на 33. Лемківску Творчу Осін

Припоминаме, што уж позарани зачне ся 33. Лемківска Тровча Осін, яку орґанізує Стоваришыня Лемків при спілорґанізаторстві Стоваришыня «Руска Бурса» в Ґорлицях. Творчы стрічы одбудут ся в днях 11. і 12. жолтня/октобра. В тым році подія посвячена єст сотній річници народин Івана Желема – выдатного лемківского поеты і писменника, давного ґорлицкого бурсака. В суботу Творча Осін буде проходила в Ваппеным, в Здройовым Домі, а в неділю в просторах Руской Бурсы в Ґорлицях. Першого дня подія зачне ся о 15.00 год., другого о 16.00 год. Выступлят творці слова з Польщы і заграниці, а в артистичній части – ансамбль Терочка і Домініка Новотна з піаністом Петром Адамковичом зо Словациі. Доповід о Івані Желемі выголосит проф. Олена Дуць-Файфер. Стрічы товаришыла буде выстава фотоґрафій Петра Басалыґы. Вступне на обі подіі дармо.

Зреконструували град Любовня

Реконструкция пілнічно-східньой стіны граду Любовня і його III і IV двора є докінчена. По двох роках інтенсивной роботы дочекали ся одновы і касарні, котры обявили на граді по тым, як перед 15. роками впала стіна. Як інформовала Леа Леготска з Одділіня комунікациі Пряшівского Самосправного Краю, в інвестициі брали участ Міністерство Культуры Словациі і заряджуватель Любовняньского Музею – Пряшівскій Самосправный Край. Попри реконструкциі створил ся і новый простір про соколярів, так званый соколярскій двір. Вчас робіт археолоґы нашли дакілько цінных історичных артефактів, медже нима горці, мискы, погары, монеты, мосяжны ґудзикы з мундуру вояка ци брытву. Реконструкция зачала в вересни/септембрі 2023 р., закінчыли єй в серпни/авґусті того рока.