Осінні подіі Стоваришыня Лемків: Лемківска Творча Осін і Стрічы Трьох Поколінь

По літнім часі культурных подій вкрочыли сме в осінній період, коли тіж ся дашто цікаве орґанізує. Так призрийме ся двом дальшым подіям, якы орґанізує Стоваришыня Лемків. Єдна з них одбуде ся уж о ден, друга – дакус пізнійше на західніх землях.

Треба підкрислити, што обі то постійны подіі в шторічным календари орґанізациі. Лемківска Творча Осін як камеральна стріча каждого рока анґажує до участи люди, якым близкій є духовый звязок з Лемковином. Друга – Стрічы Трьох Поколінь з Лемківском Культуром, то подія, якой цілю єст вказати тото, што видно голым оком – лемківскы співы, танці і музику.

Лемківска Творча Осін

Тогорічна стріча творців слова і артистів одбуде ся уж 33. раз. Спілорґанізатором подіі од шумных років є Стоваришыня «Руска Бурса» в Ґорлицях, якє гостит подію і в своіх порогах.

Творчы стрічы одбудут ся в днях 11. і 12. жолтня/октобра. В тым році подія посвячена єст 100. річници народин Івана Желема – выдатного лемківского поеты і писменника.

Вродил ся Іван Желем 3. квітня/апріля 1925 р. в Вапенным коло Ґорлиц, де і скінчыл основну школу. По ній, в 1937 р. остал учеником ґорлицкой ґімназиі і рівночасно вступил в шор выхованків Руской Бурсы. Был єдным з тых, якым пришло дальше жытя провести на радяньскій Украіні. Вмер во Львові, 6. вересня/септембра 1988 р.

Писал не лем патріотичны вершы, але тіж гуморескы, новелі, оповіданя, та критичны і публицистичны тексты.

Так тіж суботня част Лемківской Творчой Осени буде в рідным селі поеты – Ваппеным, в Здройовым Домі (початок о 15.00 год.).

Традицийні недільна част буде в просторах ґорлицкой бурсы (початок о 16.00 год.). Так першого, як і другого дня запрезентуют ся творці слова з Польщы і заграниці, а в артистичній части – ансамбль Терочка і Домініка Новотна з піаністом Петром Адамковичом зо Словациі. Доповід о Івані Желемі выголосит проф. Олена Дуць-Файфер. Стрічы товаришыла буде выстава фотоґрафій Петра Басалыґы. Може обявит ся дака свіжа артистична душа? Придете – переконате ся.

Три поколіня

О два тыжні перенесеме ся на далеку чужыну – землю, де прожыват уж такой третє, четверте поколіня потомных выселенців з Лемковины. Пшемківскій Кружок Стоваришыня Лемків просит на 18. Стрічы Трьох Поколінь з Лемківском Культуром.

І тым разом подія потырват аж два дни (під тым взглядом не ріжнит ся од Лемківской Ватры). Успіх попередніх едиций справил, што стоваришыньовым кругам з Пшемкова приходит дяка орґанізувати більшу, а не меньшу подію як в попередніх едициях.

Першый ден одбуде ся в пятницю 24. жолтня/октобра в Хойнові, в Містецкым Осередку Культуры Спорту і Рекреациі (початок о 18.00 год.).

Другій ден подіі верне до ґаздівского гнізда – Пшемівского Осередка Культуры і Бібліотекы. Тота част зачне ся о 16.00 год.

Традицийно тіж знаме єдно – выступит стоваришыньовый Лемківскій Ансамбль Пісні і Танця «Ластівочка». Загадком, яка выявит ся аж вчас подіі, будут дальшы гості – ансамблі, якы того рока выступлят на запрошыня орґанізаторів.