Вмер Димитрий Рыджанич (1951-2025), долголітній війт ґміны Устя Рускє

Несподівано, 9. жолтня/октобра 2025 р. вмер Димитрий Рыджанич, бывшый війт ґміны Устя Рускє, якій на посаді был в роках 2001-2018.

«В віку 73 років одышол знаменитый, досдівченый і міцно заанґажуваный в справы локальной соспільности самоурядовец, одданый цілым серцьом жытелям ґміны» – пише на своім вебсайті уряд устяньской ґміны.

Димитрий Рыджанич вродил ся 14. жолтня/октобра 1951 р. на землях выгнаня – в Вількові, де в рамках акциі «Вісла» выселены были його родиче. По повороті на Лемковину – жыл і діял як раз ту.

В минулости был тіж кєрівником Малопольского Осередка Рільничого Порадництва. Был заанґажуваный в локальных пожарничых структрурах. Выполнял функцию презеса Заряду Ґмінного Одділіня Звязку Охотничых Протиогньовых Страж Польской Республикы в Устю Рускым.

На посаді війта ґміны Устя Рускє был од 2001 р. Скорше был заступцьом. В роках 1994-2002 был выбераный на ґмінного радника. По 2018 р. перешол на пенсию, а неодолга зас засіл в Раді Ґміны.

За період долголітнього урядуваня розвинул ґміну Устя Рускє, в тым поєдны села. Брал участ в лемківскых ініциятивах і подіях. Підпоруювал розвиток аґротуристикы в Низкым Бескіді.

Похоронны богослужыня пройдут в неділю, 12. жолтня/октобра в церкви св. Параскєвы в Квятони, а пак одведут Покійного на цмонтір.

Вічная Памят!