Сумар дня на 11. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 11. жолтня/октобра 2025 р.

Покровы Пресвятой Богородиці на Лемковині

Вчера подля юлияньского календаря проходил праздник Покровы Пресвятой Богородиці, якій єст храмовым святом в ріжных парохіях православной перемышльско-ґорлицкой єпархіі. На Лемковині церкви Покровы Пресвятой Богородиці находят ся м.ін. в Ганчові, Ждыни, Волівци, Бліхнарці ци Команчы. Архієрейска Божеска Літургія в ден праздника служена была в Ганчові, богослужыня очолювал Його Высокопреосвященнійшый Владыка Паісий, перемышлько-ґорлицкій архієпископ. Святочны богослужыня правлены были тіж в інчых церквах. В Волівци літургію правил о. Мирослав Цідило, парох православной парохіі свв. Космы і Даміяна в Бортным, яка обнимат окрем Бортного іщы і Бодакы і Воловец. В принагідній проповіди о. Цідило навязал до значыня і ролі Богородиці в жытю каждого чловека, а тіж до історичных дій, котры дали початок святу – то спомин подіі з 910 рока, коли в Константинополи підчас всеночной обявила ся Божа Матір.

Выремонтуют дорогы в ґорлицкым повіті

В понедільок 13. жолтня/октобра в Делеґатурі Малопольского Воєвідского Уряду в Новым Санчы віцевоєвода Ришард Смялек підписал 22 умовы з представниками ґорлицкого повіту. Є то дальше підпертя для самоурядів в усуваню наслідств тогорічных природнычых катастроф. В стрічы участ взяла тіж посланкыня Уршуля Новоґурска. Ґорлицкій повіт і три ґміны з його терену отримали разом 7,3 млн зл урядового підпертя на одбудову знищеных доріг. Повітовы дорогы на одтинках Ропа-Брунары, Маластів-Ясюнка та Ганчова-Ставиша-Снітниця будут перебудуваны. Ґміна Ропа достане грошы м.ін. на ремонт доріг в Лоси і Климкивці, ґміна Санкова – на ремонты доріг в Мацині Великій і Рыхвалді, а ґміна Устя Рускє, завдякы підпертю воєвідства, выремонтує три фраґменты доріг – Ґладышів-Устя Рускє, Ждыня-Липна-Чорне та на одтинку до Нижнього до Выжнього Реґєтова. Урядове дофінансуваня походит з цільовой резервы буджету державы, признали го Міністерство Внутрішніх Справ і Адміністрациі та Міністерство Фінансів і Господаркы.

Полонины приходят з колядами!

Жіночый русиньскій ансамбль Полонины зрыхтувал платню з різдвяныма піснями Русинів зо східньой части Пряшівской Руси. На кружку буде мож почути коляды выконуваны в формі, в якій співаны были од десяток років. До каждой платні долучена буде книжочка з текстами пісен і описом русиньскых святочных звыків і обрядів. Як бонус долучене буде архівальне награня колядників з 1992 рока. Ансамбль потрібує єднак підпертя, жебы печатати платню. Соспільна колекта зберана єст через сайт donio.sk Платня вкаже ся в грудни/децембрі того рока. Дотепер повело ся уж зобрати близко 2400 евро з цілой сумы 3500 евро. В залежности од выбору, в подякуваню мож достати платню або платню з дакым ґратісом, напримір плякатом або полотняном торбом з ґрафіком авторства Домны Цєпляк, ілюстраторкы Малюванок для діти, котры печатала Руска Бурса в Ґорлицях.

О Русинах і о Ромах. Бесіды модерує Петро Медвідь

В пятницю і суботу в Пряшові одбуде ся Фестіваль Alterity Minority 2025. В рамках фестівалю обудут ся дві модеруваны бесіды. Перша з них буде тыкала ситуациі Ромів на Словациі – того, як собі радят, якы мают проблемы і што треба зробити, жебы успішнійше творити спільне соспільство. З Барбором Ботошовом, представничком ромской меншыны бесідувал буде Петро Медвідь. Друга бесіда буде пробом одповісти на звіданя – што зробити, жебы русиньска культура, котра пережыват тепер свій ренесанс по одроджыню з 1989 рока, перетырвала? Бесідувати будут Петро Штефаняк і Домініка Новотна, модерувал Петро Медвідь. Бесідам товаришыти будут концерты – в пятницю выступит Барбора Ботошова Банд – ансамбль запрезентує музику з жанру world music, з елементaмы балканьскых ритмів, чардашів, джазом і свінґом, а в суботу Calibri Gang, якій запрезентує фолькреп і русиньскы ритмы.
“