Сумар дня на 22. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 22. жолтня/октобра 2025 р.

«Ластівочка» буде святкувала 25-літя свойой діяльности!

Припоминаме, што в найблизшый вікенд 24. і 25. жолтня/октобра Пшемківскій Кружок Стоваришыня Лемків просит на 18. Стрічы Трьох Поколінь з Лемківском Культуром. Першый ден одбуде ся в пятницю в Хойнові, в Містецкым Осередку Культуры Спорту і Рекреациі (початок о 18.00 год.). Другій ден подіі верне до ґаздівского гнізда – Пшемівского Осередка Культуры і Бібліотекы. Тота част зачне ся о 16.00 год. Традицийно тіж знаме єдно – выступит стоваришыньовый Лемківскій Ансамбль Пісні і Танця «Ластівочка». Загадком, яка выявит ся аж вчас подіі, будут дальшы гості – ансамблі, якы того рока выступлят на запрошыня орґанізаторів, жебы разом з нима посвяткувати 25-літя діяльности «Ластівочкы».

Другій, обік Дровняка, найліпшый русиньскій маляр примітивіста – Михал Сірик. Выстава в Пряшові

В Русиньскым Музею в Пряшові мож обзерати нову часову выставу – то выстава малярства Михала Сірика. Експозиция посвячена єст 100. річницi народин того вызначного русиньского маляря примітивісты. Выстава презентує шырокій перегляд творочости автора. Його образы находят ся в вельох приватных і публичных колекциях, м.ін. в Музею Голокаусту в Ню Йорку. Образы презентуваны актуальні з Музею вказуют стародавный русиньскій світ – жыве село, традициі, роботы, обряды і звыкы при ріжных нагодах. Подля слів Михала Бицька, основателя Музею Енді Варголя в Меджелабірцях, Русины мают двох найвекшых наівных творців – Никыфора-Епіфана Дровняка та Михала Сірика. Выставу його творчости мож обзерати до 24. листопада/новембра того рока в Русиньскым Музею в Пряшові.

Мушына на другым, Крениця на тертім місци

Закінчыло ся голосуваня в премєровій едициі Ранкінґу Польскых Курортів орґанізуваного Маґазином Travelist. Інтернавты з цілой державы вказували місця, котры найліпше лучат здравотны, природничы і туристичны приметы. На высокым, другым, місци нашол ся курорт Мушына. Выграным остал курорт Буско. На третім місци нашла ся Крениця. Як підкрислят Марек Свіркович (Świrkowicz), шефредактор Маґазину Travelist, результаты ранкінґу вказуют, што жытелі Польщы особливо цінят корорты з долгом традицийом, якы находят ся в горах і близко гір – місця, де наутра, інфраструктура і атмофсера малых місточок творят спійну ціліст, і што штораз барже охочо глядаме спокою серед лісів, гір і мінеральных джерел. Ранкінґ Польскых Курортів то премєрова ініциятива Маґазину Travelist, котрой цілю єст популяризация державных курортів і промоция місц о вынятковых здравотных і туристичных приметах.

«Волохы в істориі і культурі Карпат» – конференция в Саноку

Цілый заранішній ден в Ентоґрафічным Парку в Саноку буде проходила наукова конференция «Волохы в істориі і культурі Карпат». В проґрамі заплянувано аж дванадцет выступлінь прелеґентів з науковых осередків в Польщы і заграницьом, а тіж робітників Музею Народного Будівництва в Саноку. Тема конференциі обнимат м.ін. волошскє осадництво і міґрациі в Карпатах, пастырска і господарча спадковина, культуровы і языковы влияня та присутніст Волохів в локальній традициі і памяти. Серед прелеґентів сут м.ін. др габ. Пьотр Клапита з доповідю пн. «Еволюция осадництва на волошскым праві в Низкым Бескіді» ци др. габ. Малґожата Місяк, яка выголосит реферат пн. «Од Черемошу по Дунаєц – Волохы в Карпатах. Языкознавча перспектива». Др габ. Роберт Слабчыньскій представит «Языково-культурный образ Волохів утырваленый в тереновых назвах польской части Карпат». Орґанізаторы просят вшыткых заінтересуваных темом, подія єст одкрыта.