Сумар дня на 24. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 24. жолтня/октобра 2025 р.

 XVIII Стрічы Трьох Поколінь з Лемківском Культуром і 25-літя «Ластівочкы»

Уж днес на Нижнім Шлеску зачынают ся 18. Стрічы Трьох Поколінь з Лемківском Культуром. До участи в дводньовій подіі просит Пшемківскій Кружок Стоваришыня Лемків. Перша стріча проходит днеска в Хойнові, в Містецкым Осередку Культуры, Спорту і Рекреациі од 18.00 год. Заран подія верне до ґаздівского гнізда – Пшемівского Осередка Культуры і Бібліотекы. Початок о 16.00 год. Традицийно тіж знаме єдно – выступит стоваришыньовый Лемківскій Ансамбль Пісні і Танця «Ластівочка». Загадком, яка выявит ся аж вчас подіі, будут дальшы гості – ансамблі, якы того рока выступлят на запрошыня орґанізаторів, жебы разом з нима посвяткувати 25-літя діяльности «Ластівочкы».

«Нижньошлезскій Мікрокосмос» в Сухій Ґурній

Заран, в суботу 25. жолтня/октобра в Палаци в Сухій Ґурній одбуде ся вернісаж новой постійной выставы пн. «Нижньошлезскій Мікрокосмос». Выстава презентує явиско ключове для повоєнной істориі Нижнього Шлеска – переселіня і депортациі населіня по другій світовій войні. Выстава бесідує тіж о Лемках, котры были насильно выселены з рідной Лемковины на західні землі в рамках Акциі «Вісла». Експозиция має вказати, чом вартат памятати о минулым і чом памяткы по дідах мают великє значыня для молодых поколінь. В рамках вернісажу одбуде ся концерт Сестер Бочнєвич, якы запрезентуют традицийны польскы і лемківскы творы. Окрем того одбуде ся і дискусийный панель о достоменности Нижнього Шлеска, як і выстава портретів повоєнных його жытелів. Буде мож тіж скоштувати традицийны стравы, котры через рокы спілтворили кулінарну достоменніст реґіону. Подія пройде заран в Палаци в Сухій Ґурній. Початок о 15.00 год. Вступне дармо.

Лабівскій Фундуш для Шолтыств піде предовшыткым на дороговы інвестициі

В будучым році ґміна Лабова перезначыт на Фундуш для Шолтыств разом 512 тис. злотых, до поділу на 13 шолтыств. Як подала війт ґміны Лабова, в Фундушы нашло ся вельо цінных ініциятив. То предовшыткым дороговы інвестициі, т.є. модернізация через утвержыня ґмінных доріг, што злегшыт доізд до хыж і землі, як і зліпшыт безпеку на сельскых обшырях. Не бракло і задач звязаных з безпеком і соспільным жытьом, м.ін. закуп ґратя для Охотничых Пожарничых Стражы ци допосажыня сельскых світлиц. Серед пропонуваных задач нашло ся тіж заґаздуваня рекреацийных обшыри, што має служыти орґанізациі локальных подій і інтеґрациі жытелів.

Зачали ся осінні перегляды гірскых желізниц і вытягів

Польскы Кабельны Желізниці (PKL) зачали осінні перегляды желізниц і вытягів. Сервіс зачал ся уж при вытягах в Татрах і ґондолях в підкарпатскій Солині. В найблизшый понедільок рушыт перегляд кабельно-тереновой желізниці на Паркову Гору в Креници. Атракция буде закрыта до 7. листопада/новембра. Пак сервіс перейдут ґондолі на Креницку Яворину, в днях од 17. до 28. листопада/новембра. Остатні будут сервісуваны креселка в Щавници. Цілю переглядів єст провірити стан гірскых желізниц і вытягів по літнім сезоні, як і прирыхтувати іх до ближучого ся зимового сезону.