В Руськім домі выставлює Юрій Молнар

Руськый клуб 1923 зорґанізовав у Руськім домі в Пряшові выставу русиньского інсітного маляря Юрія Молнара під назвов Малярь спід Мінчола. Выстава, котрой куратором є Федор Віцо, мала вернісаж в понедільок 20-го октобра 2025-го року.

Юрій Молнар є родаком із русиньского села Кыйов, Старолюбовняньского окресу, но жыє в Пряшові. Вернісаж збогатила і його родачка, співачка русиньскых народных співанок Анна Порачова, котра на події заспівала в супроводі з гуслями і акордеоном.

Молнар (19. май 1938 р.) своїй ціложывотній любви присвячав ся попри роботі. „В роднім Кыйові колись жыло ся скромні, і Юрій як хлопець мусив помагати родічам, і часто ходив пасти коровы, де мав часу позоровати оточіня і снити о своїй любви до уменя,“ пише Віцо в каталоґу ку выставі.

Хоць Юрій Молнар не має академічный тітул, свій талент розвивав. В умелецькій роботі найвеце підтримовав го ґрекокатолицькый єромононах – редемпторіста Ян Мастиляк, котрый на його адресу высловив ся, же має талент од Бога.

Образы Молнара суть іншпірованы головно родным Кыйовом, русиньскым фолклором, віров, културныма і хрістіаньскыма традіціями Русинів. „Юрій Молнар до своїх образів переносить красы природы, розкрывать чарокрасны природны сценерії, включно композіцій людей і звірят, із мотівами роботы на полю, історічны місця родного краю і міста Пряшів, де теперь жыє,“ написав Федор Віцо.

Юрій Молнар мав веце выстав, окрім іншого у 2004-ім році выставльовав на Бієнале лемківской / русиньской културы в Криниці.

Выстава Малярь спід Мінчола є приступна про заінтересованых од понеділька до пятніці в часі од 13.00 год. до 16.30 год., і в неділя од од 13.00 год. до 17.00 год. в Руськім домі, і буде єй мож видіти до половины новембра.