Сумар дня на 29. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 29. жолтня/октобра 2025 р.

 Oд 2026 рока амбулянсы в Ґорлицях і Устю Рускым будут робити неперерывно 24-годины на добу

Од початку 2026 рока систем медичного ратівництва в полудньовій части малопольского воєвідства буде розбудуваный. Міністер здоровля затвердил плян діяня Державного Медичного Ратівництва, котрый м.ін. обнимат збільшыня чысла амбулянсів і выдолжыня робочых годин в некотрых містах і ґмінах в сандецкым, лимановскым і ґорлицкым повітах. Найбільшом зміном буде зміцніня складу амбулянсів основного типу. Од 1. січня/януара 2026 р. дотеперішні двоособовы ансамблі будут звекшены до трьох. То означат же в Новым Санчы, Пивничній, Ґрибові, Ґорлицях і Устю Рускым амбулянсы будут робити неперерывно, 24-годины на добу в полным, триособовым складі. Власти Малопольского Воєвідства підкрисляют, што введены модифікациі мают скоротити час дотертя амбулянсів до пациєнтів та звекшыти доступніст помочы в наглых припадках. Новый плян діяня систему медичного ратівництва то велика орґанізацийна зміна, але предовшыткым інвестиция в безпеку жытелів реґіону.

Крениця Форум 2025

Вчера прошло одкрытя Крениця Форум 2025. Найблизшы три дни експерты, політикы, аналитикы і самоурядовці будут дискутувати о найважнішых вызванях і шансах для Польщы, Европы і світа. Тогорічна едиция форум проходит під гослом «О Польщы на поважні». В пляні подіі находит ся пят головных тематичных стежок: політична, медженародна, розвиткова, самоурядова і соспільна. Запрошены гості возмут участ в дискусийных панелях присвяченых м.ін. діяням Малопольщы в обшыри адаптациі до змін климату, зінтеґруваного пляну водной ґосподаркы ци борбы з комунікацийным выключыньом через інвестициі в обшыри розбудовы доріг і підпору транспортовой оферты. Як і в попередніх роках, в часі Вечера Малопольщы признана буде Ґосподарча Нагорода Малопольского Воєвідства, котрой цілю єст выріжнити розвиваючы ся самоуряды.

Ювілей Богдана Горбаля, лемківского історика

27. жолтня/октобра своі 60. уродины святкувал др Богдан Горбаль, выдатный дослідник, автор вельох науковых і популярных статій, дописів і книжок в польскым, анґлицкым і лемківскым языках. Родил ся в Сцінаві на Нижнім Шлеску, його родиче родом походили в Бортного і Мушынкы. Студиювал історию на Вроцлавскым Університеті і уж в тым часі зачал публикувати своі лемкознавчы дописы. По скінчыню історичных студий, оборонил докторат на Вроцлавскым Університеті, потім іщы – бібліотекознавчы студиі в нюйоркскым Квінс Коледж в ЗША. Од основаня сучасных лемківскых періодичных выдань, реґулярні зачал публикувати історичны статі в «Бесіді», «Лемківскым Календари» і «Лемківскым Річнику» ци «Річнику Руской Бурсы». Од 1997 р. робит в Нюйоркскій Публичній Бібліотеці, єст Директором Технічного Перетваряня Науковой, Промысловой і Бізнесовой Части Нюйоркской Бібліотекы та Куратором Славяньскых і Східньоевропейскых Колекций Бібліотекы. На многы і благы літа!

Выстава фотоґрафій «Лемкы»

До 31. жолтня/октобра, значыт іщы до пятниці, в Музею Народного Будівництва в Саноку мож обзерати выставу фотоґрафій зробленых Здзіславом Постемпскым і Романом Райнфусом пн. «Лемкы». Знимкы походят з меджевоєнного періоду і воєнных часів. Вказуют сцены з жытя лемківской соспільности – кадры презентуючы краєвиды лемківскых сел та портреты іх жытелів. Фотоґрафіі были позысканы з Ґалериі Фотоґрафіі Міста Ряшів та архіву Музею Народного Будівництва в Саноку. Выставу мож обзерати в будинку нр 14, што ся находит на Ґалицийскым Рынку, в годинах одкрытя музею.