Ансамбль Відимо – босоркы карпатской пісні – одпразднувал свій ювілей

В выполненій по самы берегы сали саноцкой Державной Учельні прошло 25-літя ансамблю карпатской пісні Відимо. Близко тригодинный концерт, підчас котрого запрезентували ся ювіляткы і запрошены артисты, принюс вельо емоций і зворушынь. Сцену здомінувала жіноча енерґія.

Ансамбль Відимо то ґрупа основана Мариянном Яром з Санока, яка через тоты вшыткы рокы остає лідерком ансамблю, кєрівничком ґрупы та аранжерком, авторком опрацувань вшыткых пісен, і – як вельократно было повіджене зо сцены – «мамом вшыткых дівчат», «добрым духом в потребах».

Того рока ансамбль празднує 25-літя істнуваня і з той нагоды 25. жолтня/окторба в аули Державной Учельні в Саноку одбыл ся святочный концерт. Протягом років діяльности через колектив перевинуло ся коло 40 осіб, а част артисток зачала своі індивідуальны проєкты. Як раз три з них запрезентували ся підчас ювілейного концерту, то: Анджеля Ґабер, Дария Косєк і Сусанна Яра.

Діапазон пісен з Карпат

Початкы ансамблю Відимо то неформальны стрічы школярок з середньой школы в Саноку, якы захоплены карпатскыма співанками попросили Мариянну Яру о поміч. Перше музикували з інструментами, але барз скоро вказало ся, же найблизше дівчатам буде співаня без товаришучого ансамблю – a cappella, і так ся лишыло до днес. Часом, выбраным выступам товаришат бубны.

Протягом років до колективу долучали черговы особы, некотры одходили, інчы вертали, дакотры сут од початку по днес. Подібні як співанкы выконуваны ансамбльом. Дотепер опрацуваных было близко 200 творів – серед них народны співанкы, паралітурґічны пісні, коляды, щедрівкы, принагідны традицийны творы. На репертуар складают ся шыроко прониманы карпатскы пісні з перевагом лемківскых і русиньскых, почути мож так само погіряньскы, долиняньскы, бойківскы, гуцульскы, буковиньскы і інчы. Што найважнійше, пісні співаны сут вельоголосово.

На свято ансамблю зъіхали ся любителі дівчат та активности Мариянны Ярой, сама заприязнена з колективом публика. Цілый вечер вела журналистка Радия Краків, заєдно вокалистка i артистка – Ганка Вуйцяк.

Стріча зачала ся од показу специяльного відео – были то архівальны знимкы, на котрых мож было видіти творчу дорогу Відимо – од неформальных стріч і проб, через выступы на малых і локальных сценах, по великы, фестівальовы амфітеатры.

Укорінене місце на сцені фольковой музикы в Польщы

Ансамбль в своій істориі дал тисячы выступів, концертувал головні в Польщы, вельократно в Украіні, Словациі, Німцьох – де мал аж і місячне турне, та вельох інчых. Запрашаный єст на медженародны фестівалі фольковой і етнічной музикы, камеральны выступи в музеях, ґалериях і клюбах.

В 2005 році на «Одкрытій Сцені» підчас XV Фестівалю Народной Музикы «Фольковы Миколайкы» в Люблині ґрупа отримала ІІІ нагороду. Гостинні Відимо выступило на платни «Motion Rootz Exmerimental 2006» ансамблю Village Kollektiv. В 2008 році ансамбль спілпрацувал з ґрупом Blackhole Factory підчас реализациі польско-німецкого проєкту «Sanok Songlines».

В 2011 році підчас XIV Конкурсу Фольковой Музикы Польского Радия «Нова Традиция» в Варшаві Відимо отримало выріжніня та Нагороду Публику «Burza Braw». Разом з Денісом Колокольом з Запорожа, композитором електронной музикы, та Алескандром Чікмаковом, ґітаристом з Алма-Аты, в 2011 році ансамбль зреализувал проєкт Електро-Відимо, котрый был презентуваный м.ін. в Нацийональным Музею в Кракові.

З колективного Відимо в індивідуальный світ

По презентациі фотоґрафій з двома блоками пісен запрезентувало ся Відимо в його актуальным складі. Выступ переплетеный был споминами, о котры сміло звідувала Ганка. В дальшій части зо своіма проєктами выступили дівчата, якы своі початкы мали як раз в Відимо. Як перша запрезентувала ся бєщадска артистка Анджеля Ґабер, якій товаришыл ґітариста Томаш Дыбала і бубняр Домінік Мушыньскій.

По реляксацийній, з нурту інтуіцийной, музиці в выконаню вокалисткы Анджелі о теплій, низкій барві голосу, на сцену вошла Дария Косєк, як лідерка ансамблю Вернигора. Лем привидні дрібна і несміла, дала попис свого міцного, аж і могучого голосу. Презентуючы три співанкы вказала цілый спектр емоций і знюансуваня співу, а товаришучый єй на лірі Мацєй Гарна спричынил, што ціліст звучала як пронимаюче, аж і театральне, видовиско.

В дальшій части запрезентувала ся Сусанна Яра, котра наштоден выступує з ріжныма проєктами, музиками і ансамблями. Тым разом запросила до спільного выступу Ганку Вуйцяк і Аґату Сємашко, з якыма спілтворят тріо S.H.A. Хоц всітри то великы індивідуальности, тым разом дівчата, Аґата і Ганка, одступили першый плян Сусанні. Серед выконаных співанок нашла ся авторска пісня Посій же ся, посій Петра Мурянкы. То як раз Сусанна Яра причынила ся до іх спопуляризуваня. Мурянчыны Черчык, Шковраночок ци Посій же ся, посій мают десяткы тисячів высвітлінь в сервісі YouTube.

Выступі дівчат акомпаніювал на піано Павел Гараньчык, композитор, аранжер. На клявішовых інструментах товаришыт од самого початку на музичній сценi популярній днес вокалистці – Катажыні Сохацкій.

Зворушыня, слова узнаня

І в послідній части концерту на сцену вошли вшыткы актуальны і бывшы членкыні Відимо, якы змогли приіхати на ювілейный выступ. Ансамбль, в чысленным, близко двадцетособовым складі запрезентувал три співанкы, а закінчыл пісньом Тиха вода, од котрой зачала ся ціла творча дорога ансамблю.

Пак пришол час на чысленны ґратуляциі, подаркы, квітя, подякуваня і слова узнаня од вшыткых гостів і приятелів ансамблю.