Сумар дня на 31. жолтня/октобра 2025 р.

Приносиме вам сумар медияльной ґрупы ЛЕМ.фм+ на ден 31. жолтня/октобра 2025 р.

Молоды Лемкы повідят о плеканю нашой культуры в TVP2

Уж в найблизшу неділю 2. листопада/новембра в другым проґрамі польской телевізиі молоды Лемкы будут оповідати о плеканю нашой культуры. Гістми проґраму «Pytanie na śniadanie» будут композиторка Дария Кузяк, акторка і інфлюенсерка Анна Мария Дубиньска, музик і спілоснователь ансамблю ЛемОн Адам Горощак та Лемківскій Ансамбль Пісні і Танця «Кычера». Ансамбль выконат пісню «Кєд собі заспівам», яка єст головном мелодийом лемківской оперы «Голос», о котрій оповідати будут гості проґраму. Проґрам буде вказаный в TVP2 в неділю o год. 7.50. Заохочаме обзерати!

Тымчасовым директором СНМ – Музею Русиньской Культуры в Пряшові остал Ян Пивоварник

В минулым тыжни інформували сме о одкликаню з функциі директоркы Словацкого Нацийонального Музею – Музею Русиньской Культуры в Пряшові Любы Кральовой. Кральова в часі полніня функциі ожывила і розвинула музей в вельох обшырях, діяла на благо Русинів. Одкликана была без поданой причыны. З позициі єй одкликала ґенеральна директорка СНМ Андеа Предайньова, яка была до свойой функциі выбрана лем в маю того рока і затля ани раз не одвиділа Русиньского Музею в Пряшові. Як в минулый віторок поінформувал Словацкій Нацийональный Музей, ґенеральна директорка Андреа Предайньова одвиділа тот ден Музей Русиньской Культуры в Пряшові, де представила тымчасового директора Яна Пивоварника і подякувала бывшій директорці Любі Кральовій за дотеперішню працу і вклад. Припоминаме, што кінцьом марця тр. одкликаный был і директор СНМ – Музею Украіньской Культуры в Свиднику Ярослав Джоґаник. Од 1. жолтня/октобра є директором того музею як раз Ян Пивоварник. Тот з музейництвом ниґда не робил, вчыл предметы повязаны з тілесном выховом на Пряшівскым Університеті. Є членом владной партиі SNS.

Фурт мож придбати білеты на лемківску оперу «Голос» в Варшаві

Як інформуют творці лемківской оперы «Голос», фурт мож придбати білеты на черговый показ оперы, тым разом в Варшаві. Так як і перше, заінтересуваня спектакльом єст барз велькє, зато в продажы лишыло ся уж невельо білетів. Опера буде выставлена в суботу 22. листопада/новембра в Музею Істориі Польщы. Премєра оперы одбыла ся кінцьом минулого рока в Нацийональным Форум Музикы во Вроцлаві. Другій показ одбыл ся в Краківскій Опері. «Голос» то проєкт композиторкы Дариі Кузяк, якій лучыт в собі сучасну музику з лемківском народном музиком і електроніком. Сценічна презентация закладат участ двох вокалисток, лемківской капелі, оркєстры з дириґентом, танцюристів з Лемківского Ансамблю Пісні і Танця «Кычера» і сучасных. Веце о опері, в тым інтервю з єй авторком, як і коментар до посліднього видовиска в Краківскій Опері можете найти на нашым портали.

В Стащыні зачали проєкт заміряный на охорону природы

Село Стащын, якє ся находит в Сниньскым Окресі, зачынат реализувати черезграничный проєкт заміряный на охорону природы. В його рамках посадят стары сорты садовин і парковых стромів. Проєкт закладат тіж створіня практичного приручника о охороні природничой дідовизны, пропозицию візуализацийных елементів і інформацийных табличок, як і выпрацуваня соспільной стратеґіі охороны зеленых обшыри. Результатом має быти долготырвале догваріня словацкых і польскых партнерів, зліпшыня охороны природы і культурной спадковины та пошыріня свідомости о енвіроментально утримательным розвитку в приграничным реґіоні. Проєкт є спілфінансуваный Европейском Унійом в рамках проґраму Interreg Польща-Словация. Його реализация потырват до кінця марця 2027 рока.