Сумар дня на 3. листопада/новембра 2025 р.

Приносиме вам сумар медияльной ґрупы ЛЕМ.фм+ на ден 3. листопада/новембра 2025 р.

Русины звернули ся писмом до предсідателькы Европейской Комісиі

В понедільок 27. жолтня/октобра члены Рады Влады Словацкой Республикы про нацийональны меншыны за русиньску нацийональну меншыну Мартін Караш, Петро Медвідь і Мілян Ян Піліп звернули ся писмом до предсідателькы Европейской Комісиі Урсулі фон дер Леєн. Недавно еврокомісарка про розшыріня Марта Кос одвиділа Украіну, в тым місто Ужгород, де стрітила ся з представниками нацийональных меншын. Еврокомісарка Кос підчас той візиты акцентувала намагы Украіны при сполніню критерий в обшыри меншыновых прав і означыла тоту обшыр за сполнену домашню задачу. Представникы Русинів позваня не достали. Русины при тым представляют найчысленнійшу нацийональніст Закарпатской Области Украіны, але наперек реґіональному вызнаню іх культурных прав сут на цілодержавным рівни без формального вызнаня. То ім унеможливят свобідно ся ґу свому походжыню приголосити при списуваню жытелів, і при корыстаню зо своіх прав. «Дозволте нам з респектом, але ясно вказати, же выхабліня русиньской соспільности з офіцияльного єднаня о правах нацийональных меншын явит ся як свідома іґнорация іх істнуваня і оправданых пожадань. Такій поступ не лем не оддзеркалят принципів рівности меншын, котры сут фундаментом цінности Европейской Уніі, але посылат то і неправильный сиґнал о неєднакым приступі ґу народам, котры довгодобо жыют в просторі серединной Европы» – пише ся в писмі предсідательці Европейской Комісиі. «Іґноруваня русиньского вопросу з боку высоко поставленой представителькы ЕУ є не лем політично нефортунным, але і морально проблематичным. Европейска Унія бы мала быти ґаранцийом справедливости, рівности і достойности про вшыткы народы, без огляду на іх великіст ци політичну вагу».

Поміч для родины Болехів

В Ждыни тырват орґанізация помочы для родины Болехів, котры кінцьом жолтня/октобра стратили част свойой хыжы з причыны пожару. Ініциятиву координує Православный Осередок Милосердя ELEOS в Ґладышові, з благословліня Архієпископа Перемышльского і Ґорлицкого Паісия. Оген занял ціле піддаша дому Юрия і Беаты Болехів. Страты сут барз поважны. Жытелям нич ся не стало, але поміщыня, ґратя і част фінансовых середків одложеных на будуче были знищены. Кєд же ближыт ся зима, ситуация вымагат скорого діяня. Орґанізаторы апелюют, жебы сперати родину заєдно фінансово, як і через пошырюваня інформациі о колекті. Назва колекты на сайті pomagam.pl то «Odbudowa poddasza po pożarze».

«Кычера» одсвяткує свій 35. ювілей

Лемківскій Ансамбль Пісні і Танця «Кычера» інформує, што в 2026 році будут святкувати 35. річницю діяльности. Через тоты рокы з ансамбльом выступували соткы артистів. Жебы прирыхтувати ювілей і архів спомин ансамбль просит бывшых членів о выполнити анкєту, доступну на фейсбуковым сайті Кычеры. То не вшытко. По успішным старті дорослой співочой ґрупы пришол час на дальшый крок – одкрыта буде доросла танцювальна ґрупа Кычеры. Прошены сут до ней бывшы члены ансамлю, але і особы, якы дотля не гуляли в Кычері, але хотят спрібувати сил в традицийных, дозрілых лемківскых танцях і спільно плекати культуру нашых предків. Перша проба одбуде ся в найблизшу суботу 8. листопада/новембра о 10.00 год. в Ліґницкым Центрі Культуры.