Сумар дня на 10. листопада/новембра 2025 р.

Приносиме вам сумар медияльной ґрупы ЛЕМ.фм+ на ден 10. листопада/новембра 2025 р.

«Никыфор. Маляр з Крениці» в Островци Свєнтокшыскым

Вчера в Палаци Великопольскых в Ченстоціцах, в Островци Свєнтокшыскым, одкрыта была выстава образів Епіфана Дровняка пн. «Никыфор. Маляр з Крениці». На выставі презентуваных єст 50 творів з колекциі Музею Сандецкой Землі. Выставу в Палаци Великопольскых мож буде обзерати до 4. січня/януара будучого рока. При нагоді выставы, уж в тым тыжни, лемківскому малярьови буде присвячена в Палаци подія з назвом «Субота в музею». Основом буде звиджаня часовой выставы «Никыфор. Маляр з Крениці». Пак одбудут ся варштаты. Участникы будут мати задачу зінтерпретувати красу локального краєвиду, інспіруючы ся малярскым стильом Никыфора. Каждый участник створит на занятах власный образ зо свєнтокшыскым краєвидом, інспіруваный творами Дровняка. Подія в Палаци Великопольскых в Ченстоціцах в Островци Свєнтокшыскым пройде в найблизшу суботу 15. листопада/новембра. Початок о 11.00 год. Записы тырвают до найблизшой пятниці. Дрібниці находят ся на інтернетовым сайті Історично-Археолоґічного Музею в Островци Свєнтокшыскым.

Спектакль о жытю блаженного епископа Петра Павла Ґойдича

Театр Попрад просит на репризу театральной інсценізациі пн. «Вдари пастыря – фраґменты з жывота блаженного єпископа Петра Павла Ґойдича». Інсценізация была створена на основі посліднього твору словацкого прозаіка Вінцента Шікулы. Писаня твору перервала нагла смерт автора. Режысер і автор драматурґіі Каміль Жішка дополнил нескінчену повіст о додатковы материялы, так жебы як найполнійше представити жытя блаженного єпископа Петра Павла Ґойдича. В режысерскій концепциі Жішкы выступує в інсценізациі і особа автора первовзору – Вінцент Шікула, якій вказуючы жытя блаженного єпископа, одкликує ся і до свойой власной істориі. Премєра спектаклю прошла в Театрі Viola в Пряшові в 2021 р., одновлена премєра одбыла ся в минулым місяци в Театрі Попрад. Репризу буде мож видіти в Театрі Попрад іщы в суботу 29. листопада/новембра. Дрібниці і резервация місц находят ся на інтернетовым сайті театру.

Форум Позаурядовых Орґанізаций в Ґорлицях

Позаране в Ґорлицях пройде Форум Позаурядовых Орґанізаций. Ґорлицкій староста Мирослав Вальонґ та Презес Локальной Ґрупы Діяня «Ґорлицкій Бескід» Станіслав Кашык просят до участи стоваришыня, фундациі, соспільны кооперативы, кружкы сельскых ґаздынь, охотничы протигоньовы стражы і вшыткы соспільны орґанізациі. Форум одбуде ся 12. листопада/новембра в Центрі Професийной Едукациі в Ґорлицях. Єст то нагода, жебы ровинути компетенциі і підперти потенциял локальных соспільных орґанізаций. Проґрам Форуму обнимат м.ін. презентацию проєкту «Маршалківска Сіт Підпертя NGO», презентацию о преференцийных пожычках для підметів соспільной економіі та варштаты в підґрупах з обшыри права, бізнесу, маркетінґу ци фінансів та в рамках індивідуального порадництва. Орґанізациі будут мати тіж можливіст запрезентувати ся в формі стоіска в спільній простори.