Сумар дня на 7. листопада/новембра 2025 р.

Приносиме вам сумар медияльной ґрупы ЛЕМ.фм+ на ден 7. листопада/новембра 2025 р.

Колекта для одбудовы знищеной части хыжы родины Болехів

В Ждыни фурт тырват орґанізация помочы для родины Болехів, котры кінцьом жолтня/октобра стратили част свойой хыжы з причыны пожару. Оген занял ціле піддаша дому Юрия і Беаты Болехів. Страты сут барз поважны. Жытелям нич ся не стало, але поміщыня, ґратя і част фінансовых середків одложеных на будуче были знищены. Кєд же ближыт ся зима, ситуация вымагат скорого діяня. З благословліня архиєпископа Паісия, в найблизшу неділю 9. листопада/новембра во вшыткых святынях Перемышльско-Ґоролицкой Єпархіі буде проведена єпархіяльна колекта для одбудовы піддаша по пожарі в хыжы родины Болехів зо Ждыні. Окрем того продолжат інтернетова колекта, яку координує Православный Осередок Милосердя ELEOS в Ґладышові, з благословліня владыкы Паісия. Завдякы переданым дотля жертвам зачали ся уж розбірковы працы знищеной стріхы. Орґанізаторы апелюют, жебы сперати родину заєдно фінансово, як і через пошырюваня інформациі о колекті. Назва колекты на сайті pomagam.pl то «Odbudowa poddasza po pożarze».

Поступы в роботах на трасі Чырна – Баниця

На трасі Чырна – Баниця явил ся уж новый асфальт. То єднак не конец прац. Ремонт тырват на понад кілометровым одтинку дорогы, якій лучыт новосандецкій і ґорлицкій повіты. Ґотова єст уж нижня верства асфальту, але необхідне єст примірно выконаня зъіздів до посесий. Як подал бургомайстер Крениці Пьотр Рыба, то інвестиция в дволітнім циклю, зато працы будут продолжаны в будучым році. Дорога была пошырена, з 3 до 5 метрів, што значучо звекшыт комфорт шоферів. Реченый одтинок барз часто хоснуют жытелі з ґорлицкого реґіону, але то тіж головне получыня при подорожы в страну підкарпатского воєвідства. Кошт прац то понад 2 млн злотых, з чого половина походит з Урядового Проґраму Розвитку Доріг. Працы мают ся завершыти в будучым році.

Завершыли ся правы при повітовій дорозі в Тыличы

Завершыли ся працы звязаны з будовом нового тротуару при повітовій дорозі в Тыличы. Дорога была перше пошырена. Фурт продолжают єднак роботы при одтинку дорогы в Креници. Як інформує бургомайстер Крениці, працы на ул. Пулаского тыкают предовшыткым будувы санітарной канализациі і водопроводу, як і пошыріня дорогы. Роботы ведены сут в дволітнім циклю. Выконавця прирыхтує дорогу на зиму так, жебы была переіздна. Буде она пристосувана до нормального переізду, але при ограничыню скорости. Правдоподібно перерва в працах зачне ся на зламі листопада/новембра і грудня/децембра, коли хвиля може уж быти зимова.

Перша проба дорослой танцювальной ґрупы «Кычеры»

Уж заран Лемківскій Ансамбль Пісні і Танця «Кычера» просит вшыткых заінтересуваных до участи в першій пробі новооснованой дорослой танцювальной ґрупы Кычеры. Прошены сут до ней бывшы члены ансамблю, котры зас хотят станути на сцені, але і особы, якы дотля не гуляли в Кычері, але хотят спрібувати сил в традицийных, дозрілых лемківскых танцях і спільно плекати культуру нашых предків. Проба одбуде ся уж заран, в суботу 8. листопада/новембра о 10.00 год. в Ліґницкым Центрі Культуры.