Партнеры зо Словациі вказували місця памяти звязаны з І світовом войном

Mісто Ґорлиці зорґанізувало выізд до місц памяти звязаных зо спадковином І світовой войны, якы находят ся на другым боці Карпат, по словацкій страні.

6. листопада/новембра тр. місто Ґорлиці зорґанізувало студийну візиту на Словациі в рамках проєкту «GOV4PeaCE», спілфінансуваного Европейскым Фондом Реґіонального Розвитку в рамках проґраму Інтерреґ Середня Европа 2021-2027. Задачом проєкту «GOV4PeaCE» є створити соспільну трансграничну візию што до охороны культурной дідовизны воєнных дій І світовой войны. Проєкт зосереджат ся на креуваню нового підходу до проєктуваня музеів, творіня трансграничных трас і підпорі меджесекторовой спілпрацы.

Цілю выізду было зазнаємити участників з примірами охороны, упамятнінь і промоциі культурной і історичной спадковины з періоду І світовой войны по словацкій страні.

В візиті участ брали представникы чысленных орґанізаций і інституций з реґіону, в тым м.ін. ґміны Санкова, ґміны Ґорлиці, Надлісництва Ґорлиці і Надлісництва Лося, Стоваришыня Ґрупа Історичной Реконструкциі Ґорлиці 1915, Містного Комплексу Шкіл но 1 в Ґорлицях, Музею Дворы Карвациянів і Ґладышів в Ґорлицях. Присутны были тіж партнеры зо Словациі – з ґміны Нижня Полянка, Клюбу Воєнной Істориі Бескіды і Нацийонального Парку Полонины.

Участникы выізду познали шор місц памяти, котры становлят важный елемент спільной спадковины реґіону польско-словацкого погранича, м.ін. музей-ізбу пямти в Нижній Полянці, репліку деревяного костела ци пантеон – місце, якє упамятнят звязаных з І світовом войном.

В проґрамі была так само візита в Мікуляшовій, де участникы могли видіти памятник на верху Каштелик і воєнный цмонтір. Черговыма пунктами проґраму были місцевости: Смільно, Зборів і Бехерів, в котрых находят ся воєнны цмонтері і місця памяти посвячены воякам погыбшым підчас воєнных діянь.

Важным елементом выізду был реґіон граничного переходу Бехерів-Конечна, де участникы на долше затримали ся на воєнным цмонтері но 46 і перешли едукаицйном стежком, котра посвячена єст істориі східнього фронту з років 1914-1915.

«Підчас цілого дня участикам товаришыла атмосфера рефлексиі і спілпрацы. Студийна візита стала ся нагодом до выміны досвідчыня зо словацкыма партнерами, познаня добрых практик в обшыри охороны місц памяти і омовліня можности дальшой спілпрацы» – подал Уряд Міста в офіцийным комунікаті.

Проєкт «GOV4PeaCE» реализуваный є од мая 2024 року до жолтня 2026 року і має 11 партнерів з шестьох держав. Головным цільом є інтеґрация історичных місц І світовой войны до шыршых політик і стратеґій охороны культурной спадковины.

Фот. Наталия Пацана-Роман, УМ Ґорлиці