Лавреатами Премії імени Михаіла Града стали Світлана Йовдій і Мірослава Копинець

10-го новембра 2025-го року были оголошены тогорічны лавреаты Премії імени Михаіла Града за всокоченя і розвой русиньской културы і літературы.

Михаіл Град быв русиньскый поет, писатель, довгорічный голова Союзу русиньскый писателів Закарпатя. О лавреатах інформовало Русиньске літературно-културне общество, котре премію выголосило першый раз у 2023-ім році.

Премія імени Михаіла Града уділює ся в катеґорії література, де суть нагороджены підкарпаторусиньскы поеты, прозаіци і драматурґове, як і в катеґорії култура, котра є про фотоґрафів, малярів, скулпторів, музикантів ітд.

Тогорічным лавреатом за літературу стала Світлана Йовдій, лавреатом за културу была выголошена Мірослава Копинець.

Світлана Йовдій (1986 р.) є родачков із Вільхівскых Лазів, Тячовского району. Почала писати як 14-річна. Їй творчость оддзеркалює любов до русиньской културы і языка. Так само є талентованов декламаторков русиньской позії, што дає їй творам інтересну глубину і выразность, інформовало общество.

Мірослава Копинець (1980 р.) є родачков із Ужгорда. Позната русиньска співачка присвятила своє жытя всокоченю і розвитку русиньской народной співанкы. Співать автентічны народны творы, але і їх обробкы в штілі етноелектронікы.

Дванадцять років была солістков Заслуженого академічного Закарпатьского народного хору, нагороджена была на престіжных конкурзах і фестівалах.

„Їй спів – то голос Підкарпатя, што несе у світ красоту і богатство русиньской културы. Вступ Мірославы Копинець до нашого общества є великов честьов і важным кроком у всокочіню і популарізації русиньской дідовизны,“ інформовало Русиньске літературно-културне общество.

„Голова общества і членове правліня вінчують нашым лавреатам далшых творчіх верьхів, і хотять сердечно подяковати за їх неоціненый вклад до всокочіня і розвитку нашой културной дідовизны, літературы і уменя.“