Вечер з лемківском культуром з Заменицях

В найблизшу суботу, 29. листопада/новембра замецницка грекокатолицка парохія св. Йоана Крестителя буде гостила «Вечер з лемківском культуром». То подія, яка запрезентує спектрум лемківской культуры і істориі.

Парохія в Заменицях уж не раз являла ся орґанізатором ріжного рода лемківскых подій. Тым разом в проґрамі передвиджено прелекциі і лемківскє музикуваня.

В панелю тыкаючым доповіди выступит Данько Горощак з темом славных Лемків. Розповіст о людях, якых рід з Лемковины, а якы выбили ся до шыршого світа.

Севериян Косовскій буде бесідувал о личности Амвроза Ковача, славного народного філософа, його казанях, але тіж біоґрафіі, яка здає ся – мало знана. То тема на тілько актуальна, што як раз влони припоминали сме 100. річницю смерти Амроза – віщуна, автентичной постаті, а прополненой при тым даком частю вірувань і народных передань.

В части прелекций выступит тіж др Мирослав Пецух, етноґраф і робітник Любушского Музею. Буде розправлял о выселінях Лемків в 40. роках на Радяньску Украіну.

В музичній части выступлят діти і молодіж, якы творят Лемківскій Камеральный Ансамбль «Квіточок». Андрий Перегрим, якій являт ся єдным з орґанізаторів подіі, буде вюл науку лемківского співу.

Подія зачне ся о 16.30 год. і буде в просторах заменицкой парохіі.

Тота як раз парохія являт ся єдным з міцнійшых лемківскых осередків на західніх землях, а вірны заменицкой церкви то днес уж в більшости потомны выселенців з західньой Лемковины (Лемкы зо Щавника, Мушынкы, Верхомлі, Новой Веси, якы трафили до підхойнівскых сел – Рокыток, Замениц ци до Ярошівкы).