Сумар дня на 2. грудня/децембра 2025 р.

Приносиме вам сумар медияльной ґрупы ЛЕМ.фм+ на ден 2. грудня/децембра 2025 р.

Світова Рада Русиньской Молодежы стрітила ся в Коцурі

В суботу 29. листопада/новембра в сербскым Коцурі одбыло ся 4. засіданя Світовой Рады Русиньской Молодежы Світового Форум Русиньской Молодежы. Інформацию передал секретар Іван Лікар. В часі стрічы присутны бесідували о Стрічы Русиньской Молодежы, котра буде орґанізувана в 2026 році, та на тему будучых плянів. Серед найважнійшых задач находит ся офіцияльна реґістрация Світового Форум Русиньской Молодежы в Міністерстві Внутрішніх Справ Словацкой Республикы. На основі реґістрациі СФРМ буде годен одкрыти собі банковый рахунок, а пак і жадати дотациі на свою діяльніст. В звязку з плянуваном реґістрацийом важным пунктом засіданя была бесіда о зміні статусу, котрый мусит быти згідный зо словацкыма законами. Засіданя комісіі про зміну статусу буде проходило в січни/януарі або лютым/фебруарі будучого рока. Засіданя СРРМ одбыло ся в рамках 15. Медженародного Фестівалю Гумору і сатиры «Коцурска чутка». Як інформувал секретар Іван Лікар, дальше засіданя єст наплануване в онляйновій формі на 18. грудня/децембра.

Проєкт зонациі Нацийонального Парку Полонины мусит быти допрцуваный

Аґентура TASR передала, што представлена на консультациях пропозиция зонациі Нацийонального Парку Полонины стрітила ся з міцном критиком, особливо зо страны Комітету Енвіроментальной секциі Природознавчой Факульты Університету Коменьского в Братиславі. Комітет єст переконаный, што вымаганя і стандарды охороны Полонин повинны быти на высшым рівни, а пропозиция мусит быти як найбарже зближена до критерий Медженародной Уніі про охрану природы і природных джерел, лем в такій спосіб мож буде заховати найціннійшы природничо обшыри. Подля Комітету єдном з найбільшых вад представленого пляну єст клясифікация буфоровой зоны А2, простору вписаного на листу UNESCO «Стары буковы лісы», за експертами повинна найти ся в стрефі А або Б, тзн. збільшеной охороны. Подібні в примірі старых лісів, котры в актуальным пляні находят ся в стрефі Ц, а повинны найти ся в стрефі А. Додатково Комітет противлят ся обнижиню рівня охороны близко резервуару Старина, арґументуюы то забезпечыньом стратеґічного джерела воды, як і захованьом безпечной зоны для цінных ґатунків, в тым жубрів. Експерты з Комітету підкрисляют, што зонация єст кроком в практичну охорону природы, а одповіднє зрыхтуваня проєкту єст необхіне для реализациі вызначеных ціли.

Польско-Словацка спілпраца в розвитку транспорту

Вчера, 1. ґрудня/децембра, в Малопольскым Центрі Культуры Сокіл в Новым Санчы прошла медженародна конференция о польско-словацкій спілпрацы. Головном темом стрічы был розвиток желізничных і дороговых інвестиций. Як подал єден з орґанізаторів, европосланец Аркадиюш Мулярчык, транспортовы проєкты реализуваны на обшыри Польщы і Словациі повинны быти зсинхронізуваны, што дозволит на ліпшу комунікацию. Єдным з головных пунктів бесід были трансграничны получыня м.ін. розбудова желізничной сіти, так штобы з Сандеччыны дало ся доіхати потягом до Кошыц або поведіня новой леніі з Нового Санча до Старой Любовні цілю скорочыня часу дорогы. Бесідували тіж о розбудові доріг, цінных для розвитку туристикы, в тым о получыню сандецкого, лимановского і ґорлицкого реґіонів з пряшівскым крайом, а в будучым може аж і з жыліньскым. Як підкрислил маршалок Малопольского Воєвідства, Лукаш Смулка, Малопольща реализувала зо словацкыма партнерами вельо проєктів, котры тішат ся заінтересуваньом і успіхами. То вказує, же вартат підтримувати трансграничну спілпрацу і реализувати дальшы спільны задачы.