Сумар дня на 4. грудня/децембра 2025 р.

Приносиме вам сумар медияльной ґрупы ЛЕМ.фм+ на ден 4. грудня/децембра 2025 р.

Закінчыли сме термомодернізацию будівлі Руской Бурсы

Приємно нам заявити, што закінчыла ся термомодернізация будинку Руской Бурсы в Ґорлицях. Роботы были ведены в рамках дофінансуваня Міністра Культуры і Нацийональной Спадковины – з Фонду Промоциі Культуры. Была то задача пн. «Реновация і модернізация будинку Стоваришыня Руска Бурса в Ґорлицях – І етап». Дофінансуваня вынесло 350 тис. зл. В його рамак дотеплено стіны і зроблено нову елевацию будівлі. Отеплено і стріху. Окрем того повело ся вернути до історичных, первістных елементів – як окрашыня при выглядах. Зроблено і новы сходы на зовни, а тіж вымінено двері. Підсумуваня модернізациі і одкрытя «новой – старой» Руской Бурсы буде в найблизшу суботу – о год. 16.00, при нагоді святкуваня Дня Русинів Польщы.

Просиме на Ден Русинів

А кєд сме уж при нашым нацийональным святі, то уж заран 5. грудня/децембра празднуєме Ден Русинів Польщы для упамятніня віче во Фльоринці з 1918 рока, якє пак дало початок Рускій Народній Республиці Лемків. В тым році центральны святкуваня одбудут ся в суботу 6. грудня/децембра. Для упамятніня нашых предків, споминовы подіі зачнут ся стрічом во Фльоринці о год. 14.30 в долинці при грекокатолицкій церкви і плебаніі. Дальше, як каждого рока, споминовы подіі будут проходити в Рускій Бурсі в Ґорлицях. Торжество в Рускій Бурсі зачне ся о 16.00 год. В рамках музичного проґраму выступлят ансамбль Терочка та Юлия Дошна і Івона Іскра Криницка. Просиме до спільного святкуваня!

Свято Копальників

Днес поздоровляме копальників – з нагоды іх свята – тзв. Барбуркы. В календари є то 4. грудня/децембра, коли приводит ся памят о Святій Варварі, покровительці копальників. В тот сам ден за юлияньскым календарьом православна Церков припоминат праздник Введіня во Храм Пресвятой Богородиці. Нижньошлезскє Копальниче Братство днес молит ся в православній парохіі св. Тройці в Любіні. Богослужыня зачынают ся о год. 8.30 і очелят іх владыка Юрий, архієпископ вроцлавско-щеціньскій. Як і в попередніх роках – православне святкуваня обняло своім патронатом KGHM Польска Мідь.

Одбыла ся Конференция Молодых Карпаторусиністів

26. листопада/новембра в Інституті Русиньского Языка і Культуры Пряшівского Університету одбыла ся І Меджедержавна Конференция Молодых Карпаторусиністів – Русиністика в серци Европы з головном темом Культурна памят і перспективы карпаторусиністикы. Конференцию отворила Зденка Цітрякова. Звучали пак рефераты з обшыри діалектолоґіі, літературной наукы, топоніміі, медияльных студий, етнолоґіі ци істориі. На конференциі выступили не лем домашні участникы, але і реферуючы з Польщы, Чех і Сербіі. Цілю конференциі было вытворити плятформу про студентів, докторантів, зачынаючых дослідників і фаховців з практикы, котры ся русиньскым языком, літературом, історийом або культуром занимают в рамках своіх студий ци роботы.