Сумар дня на 17. грудня/децембра 2025 р.

Приносиме вам сумар медияльной ґрупы ЛЕМ.фм+ на ден 17. грудня/децембра 2025 р.

Підсекретар Стану в Міністерстві Климату і Середовиска был в Санковій

Санкова зас на мапі загальнопольской дебаты о одвертальных джерелах енерґіі. В тых днях в ґміні одбыла ся наукова конференция посвячена схоснуваню неактивных вертничых дір до позыскуваня ґеотермальной енерґіі. Подію зачала студийна візита в місци верчыня Санкова ҐТ-1. Участникы запознали ся з його параметрами і можливостями дальшого господаруваня. В стрічы участ взял м.ін. проф. др габ. Кжыштоф Ґальос – Підсекретар Стану в Міністерстві Климату і Середовиска, Головный Ґеолоґ Державы. Конференцийна част прошла в Санківскым Дворку. О актуальній ситуациі місця верчыня і плянах ґміны бесідувала війт Малґожата Малух. Підкрислила його значыня для розвитку реґіону. Примір успішного схоснуваня ґеотерміі запрезентували представникы PEC Geotermia Podhalańska, а науковці вказували на великій потенциял недіючых дір верчыня. Конференция мала доказати, што ґміна Санкова має реальный потенциял, жебы стати ся єдным з важных пунктів польской ґеотерміі.

Родина Бочнєвичів презентувала лемківскы традициі

В минулу суботу в Етноґрафічным Музею в Зеленій Горі – Охли одбыла ся подія пн. «Велиі нашых предків». Вказували на ней святочны традициі привезены через выселенців і переселенців по ІІ світовій войні. Суботню подію попередили тереновы баданя з представниками нацийональных і етнічных меншын, котры жыют на обшыри любушского воєвідства. Зобраны істориі, спомины і рецептуры поміщено в принагідным каталоґу, котрый доступный буде тіж онляйн. В суботу зепрезентували три велиі – лемківску, буковиньску і полішску. Лемківскы різдвяны звыкы, облечыня і смакы вказала родина Бочнєвичів з Пшемкова. Сестры Бочнєвич заспівали і заграли тіж пару коляд.

Прелекциі і тереновы спацеры в Ожынній

В найблизшый вікнед в Ожынній одбуде ся ІІІ Колеженьска Провідницка Стріча, котрой орґанізатором єст Осередок Еколоґічной Едукациі – Колиба в Ожынній. В проґрамі тридньовой імпрезы сут прелекциі, показы фільмів і тереновы прогулькы. В пятнцию Роман Фродима представит презнетацию «З течыном Вислокы», а в суботу о землянах з підкарпасткых дворів оповідал буде др Лукаш Байда. Вітольд Ґродзкій зреферує східньокарпатскы вандрівкы Мєчыслава Орловича і його клюбу, а др Войцєх Крукар буде мал прелекцию пн. «О повтаряючых ся гірскых назвах в Низкым Бескіді і Бєщадах». Коросняньска телевізия TV Obiektyw вкаже фільм свойой продукциі пн. «Лукасєвич нафтовник романтик». На неділю заплянуваный єст выхід в терен – піше або автами в залежности од атмосферичных условій.

Просиме до Бурсы на варштаты і велийну гостину!

Стоваришыня «Руска Бурса» в Ґорлицях запрашат на дві послідні тогорічны подіі. Перша з них одбуде ся уж в найблизшу суботу, 20. грудня/децембра. Будут то варштаты прикрасок на яличку, не треба нич зо собом брати – материялы будут чекати на місци. Початок варштатів в само полудне, зараз по пробі дітячого ансамблю Терочка. Друга подія то традицийна велийна стріча, яка проходит все кінцьом грудня/децембра. Для части буде то уж третій ден свят, а для некотрых – фурт іщы передсвяточный період. Без огляду на термін святкуваня – прошены сут вшыткы – ждати будут на вас клясичны смакы – кєселиця, грибы, горох, фізола, перогы. Перед гощыньом выступут Терочка, а пак просиме на спільне колядуваня. До бурсы мож приходити уж од рана в суботу 27. грудня/децембра, а выступ Терочкы і госитна заплянуваны сут на 16.00 год.

Фот. www.facebook.com/LubuskieCentrumInformacyjne