Сумар дня на 2. січня/януара 2026 р.

Приносиме вам сумар медияльной ґрупы ЛЕМ.фм+ на ден 2. січня/януара 2026 р.

Орґанізация Руска Матка святкувала 35 років

В неділю 28. грудня/децембра 2025 р. в Рускым Керестурі, в Сербіі, святочным проґрамом одсвяткували 35. річницю основаня орґанізациі Руска Матка, членьской орґанізациі Світового Конґресу Русинів. Інформувала о тым аґентура Рутенпрес. На ювілею были участны і підпредседа влады Автономной Покраіны Войводина Томіслав Жіґманов, председа Нацийонального Совіту Русинів Стеван Самочета, як і секретар Містной Громады в Рускым Керестурі Михайло Пашо. Торжество одкрыл председа орґанізациі Руска Матка Михайло Фейса. В рамках святкуваня участны могли видіти выставу з тогорічного VII Малярского пленеру Еуфемія Гарді, а так само приготовленый был поетично-музичный вечер, якій был присвяченый Юлиянови Надьови. В рамках подіі были і вручены нагороды за поезию і прозу ім. Юлияна Надя за 2025 р. Веце о ювілю і орґанізациі Руска Матка прочытате в дописі на нашым портали.

Председа ОСРС стрітил ся з молодыма Русинами

В понедільок 29. грудня/децембра 2025 р. в Бардийові одбыла ся стріча молодых русиньскых активістів, артистів і спортовців з председом Округлого Стола Русинів Словациі Міляном Яном Піліпом і віцепріматором міста Бардиів Петром Петрушом. Участників стрічы поздоровил і пріматор міста Бардиів Борис Ганущак. За ОСРС был участный і секретар Мафтей Допіряк. Медже запрошеныма гістми были Івана Бріллова – співачка і громадяньска активістка, Кристиян Гнат і Іван Гудак з ґрупы Calibri Gang, Лукаш Сорока – борец MMA, і Якуб Воробель – дзвоноліяр. Головном цілю стрічы было підпорити розвиток русиньской достоменности медже молодыма людми, створити простір на презентацию іх творчости, успіхів і громадяньскых активности, а єдночасно посилнити взаємну соналежніст членів русиньской народности жыючых на Словациі. Дрібниці чытайте на нашым портали.

Специяльны святочны проєкциі фільму Потопа

Як інформуют творці фільму Потопа, при нагоді свят Різдва Христового подля старого календаря будут зорґанізуваны специяльны проєкциі фільму. Одбудут ся они в днях од 2. до 11. січня/януара в кінах в містах: Снині, Гуменным, Стропкові, Требішові, Свиднику, Михаловцях, Вранові над Топльом, Пряшові, Кошыцях, Братиславі, Старій Любовни, Бардийові, Кежмарку, Попраді і дакотрых селах. Полный спис проєкций находит ся на фейсбуковым сайті фільму Потопа. «Потопа» то першый постсоциялистичный граный фільм, котрый розповідат історию выселяня при будуваню водного резервуару Старина, котре проходило в роках 1981-1988 недалеко Снины. З причыны будуваня того резервуару счезли з мапы світа русиньскы села Старина, Звала, Смольник, Велика Поляна, Рускє, Дара і Стужниця. Фільм выроснул з оточыня русиньской соспільности і награный был в русиньскым языку. Образ режысера Мартіна Ґонды мал свою премєру в листопаді/новембрі минулого рока на арґентиньскым Фестівали Internacional de Cine de Mar del Platа. Был тіж вказуваный на дальшым вызначным фестівали Goa IFFI в Індиі. Пак фільм трафил до словацкых кін. В обсаді фільму сут акторы русиньского Театру ім. Александра Духновича в Пряшові.