Уж заран «Лемківскій Вифлеєм» в Хойнові

Грекокатолицка парохія св. Йоана Крестителя в Заменицях просит на святочну подію – «Лемківскій Вифлеєм».

Колядуваня одбуде ся 4. січня/януара 2026 р. в Містецкым Осередку Культуры Спорту і Рекреациі в Хойнові (нижньошлезскє воєвідство). Початок о 16.00 год.

Час радости і веселости, якым є Рождество Христове – нерозлично асоциює ся з нашыма колядами, вертепом, вінчуваньом. Так тіж на хойнівскій сцені запрезентуют ся творці, якы выспівают так лемківскы, як і украіньскы коляды.

Выступлят приіздны з Пшемкова: дітячый ансамбль «Ластівчата» та велика «Ластівочка», што наштоден діют при тамтышнім Кружку Стоваришыня Лемків. З колядом з Лісця при Любіні придут «Молоды колядникы» – сельска коляднича ґрупа. Село Ґолішів запрезентуют «Ґолішовяне», а Ярошівку – «Ярошівяне». З лемківскым вертпом выступит ґрупа ансамблю «Кычера» з Ліґниці.

Хоц єдны уж одсвяткували Різдво Христове (за тзв. новым стильом), а другы з нас аж тепер засядут до святой Велиі (за юлияньскым календарьом), то незалежно од того час колядуваня, вінчувань і передаваня давной традициі лемківского вертепу є єден про вшыткых.

«Лемківскій Вифлеєм» одбывал ся уж в попередніх роках. Подібні як товды – так і тепер – координатором подіі є Андрий Перегрим.