Сумар дня на 12. січня/януара 2026 р.

Приносиме вам сумар медияльной ґрупы ЛЕМ.фм+ на ден 12. січня/януара 2026 р.

Сойм Польской Республикы схвалил уставу, што вызнає шлезскій реґіональный язык

Шлезскій язык зас має шансу отримати статус реґіонального языка. В минулу пятницю 9. січня/януара Сойм Польской Республикы схвалил новелизацию закону о нацийональных і етнічных меншынах, што закладат наданя шлезскій бесіді статус реґіонального языка, попри кашебскым языку. Новы переписы передвидуют тіж звекшыня репрезентациі шлезской соспільности в консультацийных орґанах державы. До Спільной Комісиі Нацийональных і Етнічных Меншын мат долучыти двох представників Шлезаків. Дальше реґуляцийом занимат ся Сенат. То уж друга в тій каденциі устава в справі шлезского языка – першу заветувал бывшый президент Анджей Дуда. Підчас повеслюдного списуваня в 2021 р. шлезску нацийональніст задеклярували 296 224 особы. Хоснуваня шлезкого языка в домашніх контактах потвердило 467 145 осіб.

До нацийональных меншын Польщы можут долучыти Грекы

Польща може вызнати дальшу нацийональну меншыну – грецку. Кінцьом минулого рока в соймі одбыло ся засіданя Комісиі Нацийональных і Етнічных Меншын, на якым віцеміністер внутрішніх справ і адміністрациі Томаш Шыманьскій подал, што міністерство має правны опініі, котры ясно вказуют, же Грекы сполняют вымогы до вызнаня іх за нацийональну меншыну. В результаті міністерство запропонувало підняти леґісляцийны працы, цілю зміны закону о нацийональных і етнічных менышнах, а соймова комісия заповіла, же зложыт одповідній проєкт в першій половині 2026 р. Вызнаня грецкой нацийональной меншыны позволит м.ін. на введіня назв місцевости і улиц в грецкым языку, емітуваня інформацийных проґамів в тым языку, діяня публичных власти для грецкого языка і вчыня го в школах. В повселюдным списуваню з 2021 р. грецку нацийональніст задеклярувало 5451 осіб.

Директорка Інституту Языковой Ріжнорідности ПР зложыла резиґнацию

Як в минулым тыжни інформувал Ансамбль Інституту Языковой Ріжнорідности Польской Республикы, др Анна Вотліньска зложыла резиґнацию з функциі директоркы Інстуиуту. Ансамбль выразил пошану і узнаня за створіня простору посвяченого стараню о языкову ріжнорідніст. Міністер Культуры і Нацийональной Спадковины поінформувал о замірі оголошыня конкурсу на становиско директора Інституту Языковой Ріжнорідности. Конкурсове поступуваня зачне ся в лютым/фебруарі того рока. Предвидуваный термін завершыня конкурсу то квітен/апріль-май тр.

Вышло нове чысло часопису «Бесіда» 

Початок Нового Рока то фурт добрый час, штобы придбати остатній номер часопису «Бесіда» за 2025 р. – пресового орґану Стоваришыня Лемків. То ч. 6 (207) за місяці листопад/груден 2025 р. Різдвяно-новорічне чысло приносит нам традицийно «Календар Бесіды на 2026 рік», якій радо вішаме в нашых хыжах. Тот номер витат нас уж святочно-новорічно. При нагоді богатый є в реляциі з подій, якы проходили осіню. Веце дрібниц на нашым портали.

Вказали ся дальшы части «Малюванок для діти» 

Кінцьом рока вказали ся дві черговы части з сериі «Малюванкы для діти» – Яр та Літо. То продолжыня сериі книжочок до малюваня печатаных перед роком – Осени і Зимы. То означат, што доступный єст уж комплет, якій обнимат вшыткы части рока. Подібні як іх в двох першых малюванках, ілюстрациі зробила Домна Цєпляк, а за зміст одповідала Варвара Дуць. Малюванкы выдало Стоваришыня «Руска Бурса» в Ґорлицях завдякы фінансуваню Міністра Внутрішніх Справ і Адміністрациі. Дрібниці чытайте на нашым портали.