Сумар дня на 19. січня/януара 2026 р.

Приносиме вам сумар медияльной ґрупы ЛЕМ.фм+ на ден 19. січня/януара 2026 р.

Становиско СКУтНіЕМ в справі актів языка ненависти проти ромскій меншыні

В минулым тыжни меншынова сторона Спільной Комісиі Уряду та Нацийональных і Етнічных Меншын подала своє становиско в справі актів языка ненависти (гейту) направленых проти ромскій етнічній меншыні. В становиску звертают ся з апельом підняти діяня для охороны ромской соспільности перед збільшаючом ся фальом языка ненависти. Як подали, в посліндіх днях 2025 р. ромска меншына, а особливо єй представник в Комісиі і його родина, стали ся предметом фалі языка ненависти, многых ворогых і стиґматизуючых выповіди, што родит глубокій непокій ромской соспільности та другых меншын. В становиску подают, што особливо важна єст сильна реакция властивых орґанів державы на вшыткы проявы языка ненависти, в тым направлены проти нацийональным і етнічным меншынам. Звертают увагу на потребу едукациі о меншынах, жебы культурна, языкова одмінніст не были претекстом до ненависти і стиґматизациі представників меншын.

Выстава «Формы пристутности. Штука Лемків/Карпатскых Русинів» одкрыта для одвиджаючых

В минулый вікенд в Державным Етноґрафічным Музею в Варшаві одкрыта для одвиджаючых была выстава під назвом «Формы пристутности. Штука Лемків/Карпатскых Русинів». Єст то перша так шырока презентация артистичного доробку Лемків / Русинів, на котрій Енді Варголь, Епіфан Дровняк (Никыфор) і Юрий Новосільскій стрітят ся з артистками і артистами фунґуючыма дотля поза головным каноном. Експозиция обнимат шырокій ґеоґрафічный контекст – од Польщы, Словациі, Мадяр, через Чехы, Румунію, Украіну і Хорвацию, аж по діаспору в ЗША. Як подає орґанізатор выставы, Державный Етноґрафічный Музей, експозиция єст свідомом історичном інтервенцийом і одповідю на вельолітню марґінализацию лемківской соспільности, а заєдно запрошыньом до рефлексиі над тым, як днес оповідати о культурах меншын. Думкодавцьом і куратором выставы єст др Михал Шымко. Выставу можете обзерати в польскій столици до 30. червця/юнія тр.

Дальшы подіі товаришучы выставi «Формы пристутности. Штука Лемків/Карпатскых Русинів»

Ближат ся дальшы подіі товаришучы выставi «Формы пристутности. Штука Лемків/Карпатскых Русинів». Першы, што прошли в минулый вікенд, были великым успіхом і притягнули величезне чысло одвиджаючых. Уж позаране, в середу 21. січня/януара пройде дальше тематичне опроваджаня по выставі пiд назвом «Варгольове „I am from nowhere”». Поведе го куратор выставы – др Михал Шымко. Подiя буде посвячена транспопови – напрямови, якiй лучыт перетинаня границ достоменности, приналежности i артистичных дисциплин з естетиком попкультуры. Порушаны будут квестиi «присутности» Лемкiв/Карпатскых Русинiв в штуцi, iх памяти i достоменности, од карпатской дідовизны по ґлобальны стратеґii сучасной штукы. Стрiча буде тлумачена на польскiй жестовый язык. Окрем того, в найблизшы два четвергы 22. і 29. січня/януара, в рамках зимовых вакаций Музей орґанiзує і родинны варштаты, направлены на дiти, молодіж i дорослых. Занятя мают едукацийно-творчый характер i навязуют до темы выставы, приближаючы участникам культуру i штуку Лемкiв/Карпатскых Русинiв. В експозицийным просторi одбудут ся плястичны варштаты, де буде мож створити рустикальны декорациi iнспiруваны карпатскыма краєвидами присутныма на выставi. Вхід на подіі в рамках білету вступу на выставу.