В Новім Орахові одсвятковали День Русинів Сербії

В суботу 17-го януара 2026-го року одбыли ся централны святкованя Дня Русинів Сербії в Новім Орахові. Централны святкованя проходять все на іншім місці, окрем того тото свято припомянули собі і в іншых місцях, де Русины в Сербії жыють.

Орґанізаторами централных святковань были Інштітут про културу войводиньскых Русинів у співпраці із Націоналным совітом Русинів і далшыма партнерами.

Свято поздоровив і підпредседа автономной влады

Як інформовала аґентура Рутенпрес, святкованя почали архієрейсков літурґійов у Церькви Хріста Спасителя, котру одправляв Преосвященый владыка Ґеорґій Джуджар, правлячій єпіскоп Єпархії святого Николая в Руськім Керестурі.

Головным пунктом проґраму была Святочна академія, котра вечур проходила за участи цінных гостів. В рамках Дня Русинів Сербії на святочній академії приговорили ся председа Націоналного совіту Русинів Стеван Самочета, владыка Ґеорґій Джуджар, шеф теріторіалной самосправы Бачка Тополя Адріян Сатмарі, асістент міністра про людьскы і меншыновы права а соціалный діалог Стефан Србляновіч, як і підпредседа влады Автономной покраїны Войводина Томіслав Жіґманов.

Почас ґалапроґраму звучала народна і церьковна співанка, но так само зазвучали і стихы із поемы Мірона Жіроша під назвов Надїя под цудзим нєбом, котра бісідує о насельованю Русинів в Новім Орахові.

Святковали два юбілеї

На тогорічных святкованя припомянули собі Русины у Сербії два вызначны юбілеї. Тот рік минать 275 років од часу, коли Русины пришли на тоту теріторію, а так само і 80 років, як Русины із Руського Керестура переселили ся до Нового Орахова. Якраз зато Нове Орахово было выбрате тот рік за місце централных святковань.

В рамках проґраму тогорічных святковань была одпрезентована і нова публікація, котрой авторами суть Любо Рац і Олена Папуґа, під назвов Вично тирва 13. май. Тота описує переселіня ся Русинів до Нового Орахова перед вісемдесятьома роками. Презентація одбыла ся в містнім домі културы за участи авторів. Выдавательом є Інштітут про културу войводиньскый Русинів.

Святкованя Дня Русинів Сербії одбыли ся і в Дюрдьові, Ґосподінцях, Бачінцях, Бікічу, ці Коцурі.

День Русинів Сербії

День Русинів Сербії є встановленый на 17-тый януар із нагоды припоминаня собі дня, коли у 1751-ім році радник Марії Терезії і адміністратор Кральовско-державного Бачского діштрікту в Зомборі Франц Йозей де Редл підписав першый урядный документ – Контракт о насельованю 200 русиньскых ґрекокатолицькых родин зо Земпліна до втогдышнього Великого Керестура.

Тот день бере ся за день насельованя Русинів на тоты теріторії. Дата Дня Русинів Сербії прияла ся у 2007-ім році, і першый раз праздник святковали у 2008-ім році.