Сумар дня на 22. січня/януара 2026 р.

Приносиме вам сумар медияльной ґрупы ЛЕМ.фм+ на ден 22. січня/януара 2026 р.

Зачал ся процес обвиненого о крадіж креста з ліґницкой церкви

Перед ліґницкым судом зачал ся процес Беніяміна В., обвиненого о крадіж креста з головной бані грекокатолицкой парохіі Успіня Пресвятой Богородиці в Ліґници. Горозит му од 1 до 10 років вязниці. Окрем того обвиненый є він за інчы крадежы, в тым желізницьовых каблів. Прокуратура хоче для него 4 рокы вязниці і обовязок заплаты за шкоды, котры в сумі сігают соток тисячів зл. Припомнийме, што в вересни/септембрі 2025 р. обвиненый пришол на мысель, жебы вкрасти дакій дорогій елемент, перетопити го і пак продати. Фінальні выбрал ліґницку грекокатолицку церков і вкрал крест, а перед тым вошол на дах, вбиял великы цвякы в бляху і так зашол на гору. Беніямін В. думал, што крест зо срібра. Справця признал ся до вшыткого, але подал, што єст узалежненый од наркотиків. Не потверджено, жебы діял з інчых причын як лем воля скорого заробітку.

Владыка Йона Максим брал участ в Тыжни молитв за єдніст християн

Од 18. до 25. січня/януара проходит Тыжден молитв за єдніст християн. В його рамках в неділю 18. січня/януара в Базилиці Святого Креста в Кежмарку одбыла ся екуменічна молитва за участи римокатолицкого і євангелицкого Костелів і грекокатолицкой Церкви. Головным служытельом был Высокопреосвященный владыка Йона Максим, пряшівскій архієпископ і митрополита. В рамках богослужыня владыка Йона запалил свічку од пашкалу, котрый є знаком воскресшого Христа, і наслідно од нього запалили свічкы вшыткы участны. Тым жестом была выражена єдніст християн в Христови, котрый є світлом світа і спаят вшыткых покрещеных до єдного общества. Подібны богослужыня проходят в тых днях і де інде, в тым Польщы, де сут так само православны, як і грекокатолицкы священнослужытелі.

Лемківскій Річник 2025

В 2025 р. Стоваришыня Лемків выдало дальшый свій періодик – Лемківскій Річник 2025. То выданя, якє є посвячене істориі та культурі Лемків. Тогорічный Лемківскій Річник посвяченый єст, по перше, памяти Богдана Ґамбаля (1965-2020). Споминову статю під назвом «Сім талантів Богдана Ґамбаля» написала Анна Кырпан. Др Богдан Горбаль опубликувал дві статі о лікарях на Лемковині за австрийскых часів і о курортах в тым часі. Ведучый СЛ Андрий Копча описал 110. річницю битвы під Ґорлицями. Севериян Косовскій написал текст о Методию Трохановскым, а Даміан Новак описал цікаву тему Тайного Братства Св. Параскєвы в Мысцовій. Дальше в части «Культура» сут публикуваны два розділы з автобіоґрафічной повісти Ярослава Трохановского. Мирослав Трохановскій описал 25-літя діяльности працовні ікон Мандиліон. Послідня част Річника посвячена єст картоґрафіі, де мапы публикує Богдан Копча. Книжку мож замовляти по контакті зо Стоваришыньом Лемків.

Пішый перехід Ужгород – Вышнє Німецкє

На граничным переході Ужгород – Вышнє Німецкє в середу в минулым тыжни отворили пішый коридор, котрый уможливит жытелям переходити границю з Украіном піше або на біциґлю. Од одкрытя переходу на пробу 3. січня/януара перешло го більше як 4000 люди. Як повіла штатна секретарка Міністерства Фінансів Словацкой Республикы Данієла Клучкова, коридор для пішых і циклистів є вкладом про обидві державы. Можливіст пішо переходити єст наслідством соспільной ініцятивы, котра вышла зо спільного засіданя власти Словациі і Украіны. На украіньскым боці были реализуваны технічны управы як приходы, семафоры і рампы для безпечного рушаня люди і циклистів. Тепер тіж словацка влада рыхтує проєкт на модернізацию просторів по своій стороні – будинків, приступовых доріг, тоалет і дальшой інфраструктуры. Іде о проєкт фінансуваный з джерель CEF в сумі більше як 8,5 мілийона евро.