Сумар дня на 28. січня/януара 2026 р.

Приносиме вам сумар медияльной ґрупы ЛЕМ.фм+ на ден 28. січня/януара 2026 р.

Конечна векша бесіда звязана з пропозициями творіня новых резерватів

Сімнадцет самоурядів зосередженых в Бєщадскым Союзі Ґмін і Повітів Погранича написало петицию, котру называют соспільном ініциятивом. Єй адресатами сут: президент, премєр, ґенеральна і реґіональна дирекция охороны середовиска і ресорт климату. Іде о думку створіня черговых резерватів природы – природничы середовиска зголосили долгій список з пропозициями новых резерватів. На тот момент на обшыри підкарпатского воєвідства є 106 резерватів, якы занимают терен 13 тис. гектарів. Як подают авторы петициі, іде о тото, жебы творіня новых резерватів было поперте доказами і даныма, жебы процес покликуваня был транспарентный, а новы резерваты были реальны до сфінансуваня і моніторуваня. В петициі зазначено, жебы новы резерваты были основаны без шкоды для мешканців і ограничынь для ґмін. Авторы петициі завнескували до власти о критичный підхід до пропозициі творіня новых резерватів і о тото, жебы ввести запропонуваны розвязаня, котры тыкают проєктуваня і вызначаня новых місц охороны природы.

Кычера, Ярошівчане, Дивная новин і інчы на концерті в Ліґници

В найблизшу суботу 31. січня/януара в Ліґници одбуде ся благодійный концерт під гослом «Коляды, котры лучат серця». Выступлят: Лемківскій Ансамбль Пісні і Танця Кычера, Ансамбль Пісні і Танця Ліґниця, дует: Наталия Бернатска і Пшемыслав Квятковскій, співочый ансамбль IV Загальноосвітнього Ліцею в Ліґници та вокально-інструментальны ґрупы Ярошівчане і Дивная новина. Артисты запрезентуют традицийны коляды і щедрівкы з ріжных реґіонів Польщы, особливо тоты, котры співаны сут серед лемківской і украіньской спільнот. Част творів буде выконана з акомпаніяментом бандуры і корбовой ліры. Ідею концерту єст медична поміч для Украіны.

Грошы для ґорлицкого повіту з Проґраму Охороны Люди і Цивільной Обороны

Веце як 2 млн зл позыскал Ґорлицкій Повіт в рамках Проґраму Охороны Люди і Цивільной Обороны на рокы 2025-2026. Середкы передал Малопольскій Воєвода і перезначыл на реализацию задач повіту і задач, котры реализує Специялистичный Шпыталь в Ґорлицях та Повітова Коменда Державной Протиогньовой Стражы в Ґорлицях. Здобыти середкы будут перезначены м.ін. на розбудову Повітового Маґазину Цивільной Обороны і його допосажыня напр. в аґреґаты ци школіня для 50 самоурядовых працівників і 120 школярів выжеосновных шкіл. Шпыталь за отриманы середкы купит специялистичну каретку, выпосажыня та перешколит персонель шпыталя. Кєд іде о коменду протиогньовой стражы, то дотация сфінансує ремонт і закуп гыдравлічного нарядя, а тіж специялистичного выпосажыня.

Торжество в Варшаві – одсвядкували іменины Його Блаженства митрополиты Савы

В неділю 25. січня/януара в Варшаві торжественно одсвяткували іменины Його Блаженства митрополиты Савы, котрого покровительом є св. Сава Сербскій. Центральне богослужыня в катедрі св. Мариі Магдалины очелювал митрополита Сава в асисті єпископів Польской Автокефальной Православной Церкви та архієпископа Александра з Украіньской Православной Церкви. В торжествах участ брали чысленно згромаджены священникы, монашкы і монахы та вірны з цілой Польщы. В імени Святого Собору Єпископів голос забрал владыка Авель, якій підкрислил заслугы митрополиты Савы як духового лідера і авторитету Православной Церкви в Польщы. Сам митрополита подякувал за спільне святкуваня, підкрислил значыня мен як духового злучыня зо своім святым покровительом і вдячности за отриману благодат. Особливо звернул ся до владыкы Александра, підкрисляючы молитовне підпертя для Украіны і єй народа, повіл, што неперестанно молит ся о мир.

Фот. cerkiew.pl